18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Շիրակի մարզպետը գլխավորելու է «Քաղաքացիական պայմանագրի» մարզային շտաբը
Քաղաքականություն
12.05.2021 | 19:13
Շիրակի մարզպետ Հովհաննես Հարությունյանը նախընտրական շրջանում գլխավորելու է «Քաղաքացիական պայմանագիր» կուսակցության մարզային շտաբը։ Քարոզարշավի ընթացքում նա արձակուրդում է լինելու։ Այս մասին այսօր հայտնեց Շիրակի մարզպետը իր պաշտոնավարման 100 օրն ամփոփելիս։
Հովհաննես Հարությունյանի խոսքով՝ դեռ պարզ չէ՝ ինքն ընդգրկվելո՞ւ է կուսակցության համամասնական ցուցակում, թե՞ ոչ։
«Շուտ է դրա մասին ասելը, որովհետև «Քաղաքացիական պայմանագիր» կուսակցության վարչության որոշումից հետո միայն պարզ կլինի՝ ովքեր և ինչ դիրքերում կլինեն ցուցակում։ Որևէ մեկն այս պահին չի կարող ասել նախընտրական ցուցակում իր ընդգրկվելու մասին»,- ասաց նա։
Շիրակի մարզպետը նշեց, որ կարևորը նախընտրական գործընթացում ամեն ինչ օրենքով կազմակերպելն է։ Վստահեցրեց՝ վարչական ռեսուրսի կիրառում թույլ չի տալու՝ անկախ այն հանգամանքից, թե որ ուժի համար է այն ծառայելու։
«Ինձ համար առաջնայինն ընտրական գործընթացն առանց օրինախախտման կազմակերպելն է։ Ես կլինեմ երաշխավոր՝ օրենքի խախտողին օրենքով նախատեսված պատիժը կիրառելու ճանապարհին»,- ասաց Հովհաննես Հարությունյանը։
Նա հավելեց, որ հստակ պարտականություն ունի՝ մարզում կազմակերպել «ՔՊ» կուսակցության մասնակցությունը ընտրություններին։
«Որպես մարզային շտաբի պետ՝ հետևելու եմ, որ նախընտրական շրջանում չլինեն այնպիսի պրոցեսներ, որոնք կվնասեն ընտրությունների ռեյտինգը, և որպես մարզպետ՝ հետընտրական պրոցեսներում պահպանելու եմ լավ մթնոլորտը, որը կստեղծվի նախընտրական պրոցեսների ժամանակ»,- ասաց Շիրակի մարզպետը։
Էմմա Չոբանյան
