11.10.2026 | 15:59
Վթարային ջրանջատում Մալաթիա-Սեբաստիա և Էրեբունի վարչական շրջաններում
ԵԱՀԿ Մինսկի խմբի ձևաչափը միգուցե հիվանդացել է, բայց չի մահացել․ Էդմոն Մարուքյան
Քաղաքականություն
09.05.2021 | 13:00
«Ակնհայտ է, որ յուրքանչյուր հաղթանակ պետք է կապիտալիզացնել, դարձնել ուժեղ պետություն: Որքանո՞վ ենք դա կարողացել անել, կարծում եմ՝ այսօր այն օրն է, որ գիտակցում ենք, որ լավ չենք այս ուղղությամբ թե մեր պետությունը կառուցել, թե արժեւորել այդ հաղթանակները, թե մեր պետական ինստիտուտների հզորությունը: Այն մարտահրավերը, որ մեզ նետվեց 2020-ին, ցույց տվեց, որ մենք հաղթանակը չենք կապիտալիզացրել, անցած տարիները մսխվել են»,- այս մասին, այսօր «Հաղթանակ» զբոսայգում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:
Պատգամավորը նշեց, որ մի բան ակնհայտ է՝ թուրք-ադրբեջանական տանդեմի դեմ ՀՀ-ն ի զորու չէ միայնակ կռիվ տալու, դրա համար պետք է արտաքին քաղաքականությունն ուժեղացնել։
Ըստ նրա՝ պետք է վերականգնվի ԵԱՀԿ Մինսկի խմբի համանախագահների խումբի աշխատանքի ձևաչափը, որովհետև Արցախի կարգավիճակի հարցի առնչությամբ նոյեմբերի 10-ի փաստաթղթում ոչինչ չկա․ «Վաղ թե ուշ այդ խումբն սկսելու է աշխատել, այդ ձևաչափը միգուցե հիվանդացել է, բայց չի մահացել, այդ ձևաչափին այլընտրանք ձևաչափ չի ստեղծվել և չկա»,- նշեց նա։
