Փոխանակ Նիկոլի վրա օրինակներ բերի, իմ վրա ա բերում. Առաքել Մովսիսյանը՝ Ալեն Սիմոնյանին սպառնալու մասին

ՀՀԿ խորհրդի անդամ, ԱԺ նախկին պատգամավոր Առաքել Մովսիսյանի (Շմայս) պնդմամբ՝ ինքը Երևանի ավագանու «Ելք» խմբակցության անդամ Ալեն Սիմոնյանին սպառնալու մտադրություն չի ունեցել, ինչպես նախկին պատգամավորը ձևակերպեց՝ ընդամենը ուզեցել է դաստիարակել:

«Թող տեղն իմանա, չափն իմանա, գլուխն էլ պատեպատ տա, որ մյուս անգամ առանց ճանաչելու, առանց հասկանալու մարդու վրա չգրի»,- Factor.am-ի հետ զրույցում ասաց Առաքել Մովսիսյանը:

Նախկին պատգամավորի վրդովմունքի պատճառն այն է, որ ընդդիմադիր «Ելք» խմբակցության անդամը, խոսելով Երևանի ավագանու նիստում օրերս տեղի ունեցած ծեծկռտուքից, հիշատակել էր իր անունը:

Առաքել Մովսիսյանն այս առնչությամբ ասաց. «Փոխանակ Նիկոլի վրա օրինակներ բերի, իմ վրա ա օրինակներ բերում, ես ի՞նչ ա, իրա համար օրինակների բա՞ն եմ: Նա ինձ չի ճանաչում և իրավունք չունի տենց բաներ ասել: Զանգել, ասել եմ՝ վեր ընկի տեղդ, քո քաղաքականությունը վարի, ավագանու գործերդ արա»:

Երևանի ավագանու «Ելք» խմբակցության անդամ Ալեն Սիմոնյանից հետաքրքրվեցինք՝ ինչո՞ւ է Երևանի ավագանու միջադեպից խոսել Առաքել Մովսիսյանի օրինակով:

«Ինքը հայտնի է նրանով, որ Ազգային ժողովի դահլիճում խոսել է վիրավորանքներով, նաև իր հարցազրույցներում է վիրավորանքներ հնչեցնում և բնական է, որ իր օրինակն եմ բերում, որովհետև քաղաքական գործիչը նման բան չպետք է անի»,- պարզաբանեց Ալեն Սիմոնյանը:

Մեր դիտարկմանը՝ Առաքել Մովսիսյանը պնդում է, որ չի սպառնացել, Սիմոնյանը հակադարձեց. «Եթե դու լրագրող ես, ես զանգում, ասում եմ՝ էս նյութը դո՞ւ ես գրել, ես քո սենցը, նենցը, հիմա դա սպառնալի՞ք է, թե՞ չէ: Պարզ է, որ սպառնալիք է, սպառնալիքն էդպես է լինում»:

Նկատենք՝ Առաքել Մովսիսյանը Երևանի ավագանու միջադեպի առնչությամբ ավելի վաղ հայտարարել էր. «Ես, որ ընդեղ լինեի, գիտե՞ս ինչ կանեի էդ կանանց, բախտները բերել է, որ չեմ եղել»:

Հ.Գ. Առաքել Մովսիսյանը հարցազրույցի ընթացքում հնչեցրեց վիրավորանքներ, որոնք հրապարակման ենթակա չեն:

Շողիկ Գալստյան