09.06.2026 | 00:17
Մարկո Ռուբիոն շնորհավորել է Փաշինյանին
ԱԺ-ն առաջին ընթերցմամբ ընդունեց նախադպրոցական կրթական ծառայությունների լիցենզավորման նախագիծը
Քաղաքականություն
07.05.2021 | 18:26
ՀՀ Ազգային ժողովն առաջին ընթերցմամբ ընդունեց Կառավարության կողմից ներկայացված «Լիցենզավորման մասին օրենքում լրացում կատարելու մասին» և կից ներկայացված օրենքների նախագծերի փաթեթը, որով առաջարկվում է լիցենզավորման դաշտ բերել մանկական զարգացման կենտրոնները։
Նախագծերի փաթեթը ԱԺ-ում ներկայացրեց հիմնական զեկուցող ԿԳՄՍ նախարարի տեղակալ Ժաննա Անդրեասյանը:
«Նախադպրոցական ցանկացած տեսակի կրթական ծրագրերը և նախադպրոցական ծառայությունները կարող են իրականացվել միայն լիցենզիայի առկայության դեպքում՝ ՀՀ օրենսդրությամբ հաստատված կարգով»-ընդգծեց փոխնախարարը:
«ՀՀ-ում առկա են մոտ 300 կազմակերպություններ՝ զարգացման կենտրոնների անվան տակ, որոնք իրականացնում եմ նախադպրոցական տարբեր ծրագրեր, այդ թվում նաև այլընտրանքային: Կենտրոնները, գործելով վերահսկողությունից դուրս, չեն ապահովում երեխաների առողջության և անվտանգության նվազագույն պահանջները՝ սանիտարահամաճարակային, հակահիգիենիկ, հակահրդեհային անվտանգության և մյուս բաղադրիչներով: Շատ դեպքերում այդ կենտրոնները գործում են առանց հստակ չափանիշների և չեն ապահովում Կրթության մասին օրենքնի պահանջները»,- նշեց Անդրեասյանը՝ հավելելով, որ նախարարությունը ստանում է զարգացման կենտրոններում խախտումների վերաբերյալ բազմաթիվ ահազանգեր: Փոխնախարարի խոսքով՝ նախագծով առաջարկվում է նախադպրոցական կրթական ծրագրերով և ծառայություններով գործունեություն ծավալելու համար ունենալ լիցենզիա և նախատեսված պահանջների ու պայմանների վերաբերյալ միասնական վերահսկման մեխանիզմներ և դրանք չպահպանելու դեպքում պատժամիջոցների կիրառման հստակ չափանիշներ կլինեն:
Նախագծերի փաթեթն ընդունվեց 76 «կողմ», 1 «դեմ» և 1 «ձեռնպահ» ձայներով:
