Քոչարյանն ընդդեմ Փաշինյանի նիստը հետաձգվեց․ Փաշինյանի ո՞ր խոսքերն է հայցվորը գնահատել «զրպարտչական»

Երևանի ընդհանուր իրավասության դատարանում, դատավոր Ալեքսեյ Սուքոյանի նախագահությամբ, կայացավ Ռոբերտ Քոչարյանն ընդդեմ Նիկոլ Փաշինյանի գործով նախնական դատական նիստը։ Քոչարյանի ներկայացուցիչ Հայկ Ալումյանը դատարանում մեջբերեց Փաշինյանի՝ 2020 թվականին Տաթև համայնքում ասված այն խոսքերը, որոնք իրենք գնահատել են զրպարտչական․ «Ասում եմ անվանական՝ Ռոբերտ Քոչարյա՛ն, եվրոպացիների փեշերի տակ չեք թաքնվի, ձեր թալանածը կոպեկ-կոպեկ պիտի բերեք բանակի զարգացման և Արցախի ինքնորոշման գործին դնենք, չբերեք՝ բերման կենթարկենք»։

Բացի այս՝ Ալումյանը մեջբերեց Փաշինյանի մեկ այլ միտք․ «Նրանք ՀՀ-ում քաղաքական գործունեություն վարելու հնարավորություն չունեն՝ Ռոբերտ Քոչարյանի գլխավորությամբ, նրանք հիմա միայն մի բան ունեն անելու՝ բանակից թալանածը կոպեկ-կոպեկ վերադարձնեն բանակին, Զինված ուժերին, ՀՀ-ին, Արցախին, ու ժողովուրդը կորոշի՝ ներել նրանց, թե՞ չներել»։

Փաստաբանն ասաց, որ Փաշինյանն այս հայտարարությունը անելիս գտնվել է արձակուրդում, և պետք է հստակեցնել, թե նա դրանք ասել է որպես մասնավոր անձ, թե՞ երկրի վարչապետ։ Ռոբերտ Քոչարյանի ներկայացուցիչը նաև երրորդ արտահայտությունը մեջբերեց։ «Ես հայտարարել էի, որ առաջիկա 5 տարում 2․5 միլիարդ հավելյալ պետք է ծախսենք մեր բանակի վրա, որից 1․5-ը Ռոբերտ Քոչարյանի և նրա ընտանիքի մոտ է, թող բերեն վերադարձնեն, իսկ ՍԴ-ն նրանց հույսն է, որ ասի՝ չէ, գիտե՜ք, իրավակիրառ պրակտիկա կա, բլա-բլա-բլա»,- եզրափակեց Ալումյանը։

Փաշինյանի ներկայացուցիչ Գևորգ Գյոզալյանը հարց ուղղեց հայցվորի ներկայացուցիչ Հայկ Ալումյանին՝ ընդունո՞ւմ է, որ թե՛ հայցվոր, թե՛ պատասխանող կողմը քաղաքական գործիչներ են։ Փաստաբանը նկատի ուներ, որ այս հայտարարությունները քարոզարշավի ընթացքում են արվել և քաղաքական, «գնահատողական» բնույթ են կրում։

Դատարանը հարց հնչեցրեց՝ կա՞ն հաշտության եզրեր կողմերի միջև, ինչին Փաշինյանի ներկայացուցիչն արձագանքեց, որ իր վստահորդից չունի նման ցուցում։ Գյոզալյանը հարցրեց՝ Ալումյանը տեղյա՞կ է, թե ինչպես է իր ծախսերը Քոչարյանը հոգացել 1998-2008 թվականներին, արդյո՞ք միայն աշխատավարձով և որքան է այն կազմել։ Գյոզալյանն այս հարցը պատճառաբանեց նրանով, որ իր վստահորդն այդ գնահատողական դատողություններ անելիս ունեցել է որոշակի փաստեր, որոնք իրենք դատարանում կհրապարակեն։ Դատարանը հարցը հանեց։

Հայկ Ալումյանը դատարանում նաև ասաց, որ իրենք, որպես բարոյական վնասի փոխհատուցում, պահանջում են 2 միլիոն դրամ։ Դատավորն ասաց, որ այլ դատական նիստ ունի և հետաձգեց այսօրվա նախնական դատական նիստը։

Հաջորդը տեղի կունենա սեպտեմբերի 14-ին ժամը 11․00-ին։

Լիլիթ Շաբոյան