Բաքուն հսկայական եկամուտներ է կորցնում․ դադարեցվել է Թուրքիա գազի մատակարարումը

Ադրբեջանից Թուրքիա գազի արտահանման պայմանագրի ժամկետը լրացել է ու գազի մատակարարումը դադարեցվել՝ Բաքվին թողնելով առանց խոշոր եկամտի, որը ստանում էր իր ամենամեծ գազի սպառողից։ Չնայած երկու երկրների քաղաքական ջերմ կապերին, Անկարան չի շտապում երկարաձգել պայմանագիրը ՝ համարելով, որ ունի գերիշխող դիրք. գրում է Eurasianet-ը:

BP- ն, որը ղեկավարում է Ադրբեջանի «Շահ Դենիզ» գազի հանքավայրը շահագործող կոնսորցիումը, որտեղից գազը արտադրվում և վաճառվում է Թուրքիային, Eurasianet- ին հայտնել է, որ պայմանագրի ժամկետի ավարտից հետո՝ ապրիլի 17-ին, մատակարարումը դադարեցվել է, սակայն երկարաձգման մասին բանակցությունները շարունակվում են:

2001 թվականին ստորագրված պայմանագրով ՝ Թուրքիայի պետական ներմուծող Botas ընկերությունը տարեկան մինչև 6,6 միլիարդ խորանարդ մետր գազ է ներմուծում AGSC ընկերությունից, որը ներկայացնում է «Շահ Դենիզ» գազի հանքավայրը շահագործող վեց ընկերությունների կոնսորցիումը:

Այս պայմանագրով վաճառված գազը Թուրքիա է հասցվում Վրաստանի տարածքով՝ Բաքու-Թբիլիսի-Էրզրում խողովակաշարով:

Այս խողովակաշարով մատակարարվում է գազի կեսից ավելին, որը Թուրքիան գնում է Ադրբեջանից:  TANAP գազատարը, համաձայն պայմանագրի, տարեկան 6 միլիարդ խորանարդ մետր գազ է մատակարարում Թուրքիա: Ընկերությունից Eurasianet- ին հայտնել են, որ այդ խողովակաշարով մատակարարումները շարունակվում են անխափան, սակայն մատակարարումների ծավալը չի ավելացվել՝ մյուս պայմանագրի ժամկետի ավարտի պատճառով:

Լրատվականը գրում է, որ բանն այն է, որ գազի մատակարարման ցանկացած ժամանակավոր պակասուրդ Թուրքիան կարող է լրացնել մյուս երկու՝ Ռուսաստանից ու Իրանից եկող խողովակաշարերի միջոցով կամ բնական հեղուկ գազի ներկրմամբ։

Սակայն լրատվականը նշում է, որ չնայած գազի մատակարարման նման հետաձգմանը հավանականությունը քիչ է, որ Թուրքիան չի վերականգնի գազի ներկրումն Ադրբեջանից։

Տաթև Ֆռանգյան