19.05.2026 | 18:27
«Իշխանական պատվեր է». Նարեկ Կարապետյանը՝ ФСБ-ի և Սամվել Կարապետյանի կապն արձանագրած հետաքննության մասին․ ՏԵՍԱՆՅՈՒԹ
Եթե Մարտի 1-ի գործով մեր դիմումը չբավարարվի, վարույթում եղած մեղադրանքի մասով անելիքն ավարտվում է. Արթուր Դավթյան. ՏԵՍԱՆՅՈՒԹ
Հասարակություն
30.04.2021 | 15:35
«Մարտի 1-ի» վերաբերյալ քրեական գործը բացահայտվածության հատվածով գնացել է դատարան, մնացած մասով ունենք անջատված մաս, որը միջդատական վարույթում է. բացահայտված գործը միջդատական վարույթում չի մնում։ Այս մասին այսօր՝ ապրիլի 30-ին, լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ անդրադառնալով վարչապետ Նիկոլ Փաշինյանի այն հայտարարությանը, որ «Մարտի 1-ի» գործը բացահայտված է: «Ինձ վարչապետի խոսքը մեկնաբանելու հարցադրումներ մի՛ արեք, հարցրե՛ք վարչապետին»,- նշեց Դավթյանը։
Անդրադառնալով դիտարկմանը, թե իրեն մեղադրում են «Մարտի 1-ի» գործը տապալելու մեջ, ՀՀ գլխավոր դատախազն արձագանքեց. «Ես փնտրում եմ այդպիսի մեղադրողի, որ մի օր դեմս կանգնի»։
Անդրադառնալով ԱԺ պատգամավոր Արման Բաբաջանյանի այն խոսքին, որ «Մարտի 1-ի» գործը տապալելու համար պետք է հրաժարական ներկայացվի, Դավթյանն ասաց. «Հրաժարական տալն ինքնանպատակ չէ, եթե որևէ պետական պաշտոնատար անձ նախանձախնդիր է։ Հրաժարական տալու փաստն ինքնին պատասխանատվությունից խուսափել է։ Հրաժարական պետք է տալ այն ժամանակ, երբ քո պաշտոնական պարտականությունները քո համոզմունքով իրականացնելու համար ունես խոչընդոտներ»։
Անդրադառնալով Սահմանադրական դատարանի կողմից ՀՀ ՔՕ 300.1-րդ հոդվածը հակասահմանադրական ճանաչելուն և դատախազության գործողություններին՝ Արթուր Դավթյանն ասաց. «Ունենք Սահմանադրական դատարանի որոշում, ունենք դրա արդյունքում առաջին ատյանի դատարանի կողմից կայացված դատական ակտ։ Այդ դատական ակտը մեր կողմից վիճարկվել է Վերաքննիչ դատարանում՝ համապատասխան հիմնավորումներով։ Եվ այդ գործի մեր պատկերացրած իրավական հեռանկարի հարցով նաև նախաձեռնել ենք դիմում ՍԴ-ին»։
Հարցին՝ այդ գործընթացով ի՞նչ հեռանկար պետք է սպասել, ՀՀ գլխավոր դատախազն ասաց. «Եթե մեզ հաջողվում է հասնել մեր դիմումի բավարարմանը ՍԴ-ում, մենք հնարավորություն ենք ստանում այդ գործով ամբաստանյալների արարքները վերաորակելու, և, ըստ էության, գործի քննությունը շարունակելու, ապացույցները հետազոտելու, դրա արդյունքում համապատասխան դատական ակտին»։
Հարցին՝ եթե դատախազության դիմումը չի բավարարվում, ի՞նչ քայլեր են արվելու, Դավթյանը պատասխանեց. «Ուրեմն մենք չենք կարողանալու իմ ասած իրավական ճանապարհով գնալ»։
«Մարտի 1-ի գործով նախաքննության փուլում անջատված մաս կա, որն իր մեջ ներառում է ոչ միայն անձանց սպանությունների վերաբերյալ հատվածները, այլ նաև այդ գործընթացին առնչված բազում այլ հանցավոր դրսևորումներ։ Եթե քննության արդյունքում կպարզվի գործով ամբաստանյալների այլ հանցավոր դրսևորում, ուրեմն միջդատական վարույթի գործով նրանց նկատմամբ կիրականացվի հետապնդում: Այսինքն՝ եթե Մարտի 1-ի գործով մեր դիմումը չբավարարվի, վարույթում եղած մեղադրանքի մասով անելիքն ավարտվում է»,- ասաց ՀՀ գլխավոր դատախազը։
Մանրամասները՝ տեսանյութում:
