07.10.2026 | 22:05
Վրաստանի կրթության, գիտության և երիտասարդության նախարարի հետ քննարկվել են համագործակցության հեռանկարները
Ցավոք, Ադրբեջանը դեռևս չի վերադարձրել հայ ռազմագերիներին ու պահվող անձանց․ Փաշինյանը՝ Միշուստինին
Քաղաքականություն
29.04.2021 | 17:15
ՌԴ վարչապետ Միխայիլ Միշուստինը ՀՀ վարչապետի պաշտոնակատար Նիկոլ Փաշինյանին է փոխանցել ՌԴ նախագահ Վլադիմիր Պուտինի ողջույններն ու նշել է, որ Ռուսաստանը բարձր է գնահատում Հայաստանի հետ եղբայրական հարաբերությունները, դրանք բազմամյա դաշնակցական ու ռազմավարական բնույթ են կրում, գրում է «ՌԻԱ Նովոստին»։
«Նախ ցանկանում եմ փոխանցել ՌԴ նախագահ Վլադիմիր Պուտինի ջերմ ու լավագույն մաղթանքները»,- ասել Միշուստինը Փաշինյանի հետ հանդիպմանը։
Նա ընդգծել է, որ Մոսկվան բարձր է գնահատում Երևանի հետ եղբայրական հարաբերությունները։ Ռուսաստանի կառավարության ղեկավարը նշել է, որ Լեռնային Ղարաբաղում ռազմական գործողությունների ավարտից հետո ընդունված Ադրբեջանի, Հայաստանի և Ռուսաստանի ղեկավարների հայտարարությունները մեծ հնարավորություններ են ստեղծում համատեղ աշխատանքի համար:
«Սա առաջին հերթին տնտեսական և տրանսպորտային բոլոր կապերի ապաշրջափակումն է, նոր ենթակառուցվածքային ուղիների ստեղծումը: Այս ամենը պայմաններ կստեղծի Անդրկովկասի տարածաշրջանի կայուն զարգացման համար», – ասել է Միշուստինը:
Իր հերթին ՀՀ վարչապետ Նիկոլ Փաշինյանը հայտարարել է, որ արդյունավետ է գնահատում Լեռնային Ղարաբաղում ռուս խաղաղապահների գործունեությունը: «Ցանկանում եմ հատկապես նշել այն դերը, որը խաղացել են Ռուսաստանն ու Ռուսաստանի Դաշնության նախագահ Վլադիմիր Վլադիմիրի Պուտինը Լեռնային Ղարաբաղում պատերազմը դադարեցնելու գործում: Եվ ցանկանում եմ ընդգծել, որ արդյունավետ եմ գնահատում ռուս խաղաղապահների գործունեությունը Լեռնային Ղարաբաղում, դա մեզ համար արդեն ակնհայտ է։ Սակայն ցանկանում եմ նշել, որ, ցավոք, Ադրբեջանը դեռ չի կատարել նոյեմբերի 9-ի եռակողմ հայտարարության շատ կարևոր կետը: Այն վերաբերում է ռազմագերիների, պատանդների և պահվող այլ անձանց վերադարձին», – ասել է Փաշինյանը Միշուստինի հետ հանդիպմանը:
Տաթև Ֆռանգյան
