18.02.2026 | 23:28
Ստեփանծմինդա-Լարս ավտոճանապարհը փակ է
Բլինքենը զգուշացրել է Թուրքիային՝ ռուսական զենք գնելու դեպքում նոր պատժամիջոցներ կլինեն
Քաղաքականություն
29.04.2021 | 13:10
ԱՄՆ պետքարտուղար Էնթոնի Բլինքենը նախօրեին ասել է, որ Թուրքիան ու ԱՄՆ-ի մյուս դաշնակիցները պիտի զերծ մնան ռուսական զենքի հետագա գնումներից՝ սպառնալով նոր պատժամիջոցներով։ Այս մասին գրում է Reuters-ը։
Աղբյուրի փոխանցմամբ՝ ՆԱՏՕ-ի դաշնակիցներ Թուրքիայի ու ԱՄՆ-ի վատ հարաբերություններն ավելի սրվեցին, երբ նախագահ Ջո Բայդենը 1915 թվականի հայերի կոտորածները ճանաչեց «ցեղասպանություն»՝ վրդովվեցնելով Անկարային։
Անդրադառնալով Հայոց ցեղասպանությանը՝ Բլինքենն ասել է, որ հաշվի առնելով Բայդենի վաղեմի տեսակետը Հայկական հարցի շուրջ՝ նրա որոշումը անակնկալ չէր ու չպետք է լիներ։ Նա նաև վերահաստատել է, որ Թուրքիան Վաշինգտոնի համար ՆԱՏՕ-ի կարևոր դաշնակից է ու հույս հայտնել, որ կողմերը կարող են լուծել իրենց հարցերը։ Սակայն Բլինքենը նաև զգուշացրել է Անկարային ու մյուսներին՝ զերծ մնալ Ռուսաստանից զենքի գնումներից, մինչդեռ Թուրքիան հայտարարել է, որ բանակցում է ՌԴ-ի հետ՝ S-400-ների նոր խմբաքանակ ձեռք բերելու շուրջ։
«Ապագայում շատ կարևոր է, որ Թուրքիան և ԱՄՆ-ի մյուս դաշնակիցներն ու գործընկերները խուսափեն ռուսական զենքի հետագա գնումներից, ներառյալ՝ S-400-ները»,- ասել է Բլինքենը:
«Ցանկացած նշանակալի գործարք ռուսական պաշտպանական կազմակերպությունների հետ կրկին կկարգավորվեն CAATSA-ի օրենքով։ Այն առանձին է և ավելացում կլինի արդեն իսկ կիրառված պատժամիջոցներին»,- ասել է ԱՄՆ պետքարտուղարը՝ վկայակոչելով «Պատժամիջոցների միջոցով Ամերիկայի հակառակորդներին հակահարված տալու մասին» օրենքը, որը նախատեսված է երկրներին հետ պահել Ռուսաստանից զինտեխնիկա գնելուց։
Էմմա Չոբանյան
