Ամերիկան վերադարձել է, Ամերիկան կրկին առաջ է գնում․ Բայդենն իր առաջին ուղերձն է հղել Կոնգրեսին

ԱՄՆ նախագահ Ջո Բայդենն իր առաջին ուղերձն է հղել Կոնգրեսի երկու պալատներին` հայտարարելով, որ իր երդմնակալությունից հետո առաջին հարյուր օրվա ընթացքում իր վարչակազմին հաջողվել է զսպել կորոնավիրուսի համաճարակի տարածումը, սկսել տնտեսական վերականգնումը և վերադարձնել Ամերիկային իր արժանի տեղը համաշխարհային հանրության մեջ, գրում է BBC-ի ռուսական ծառայությունը։

Սովորաբար, նախագահի ամենամյա ուղերձների ժամանակ, Կոնգրեսի դահլիճում ներկա է լինում շուրջ 1500 հյուր, բայց համաճարակի պատճառով Սպիտակ տան ղեկավարի ելույթը ունկնդրել է ընդամենը 200 օրենսդիր:

Նախագահի խոսքով՝ իր նախորդը իրեն թողել է մեծ ճգնաժամից ի վեր՝ ամենավատ տնտեսական ճգնաժամի մեջ գտնվող երկիր, որը գտնվում էր սարսափելի համաճարակի մեջ և բախվում է ամերիկյան ժողովրդավարության դեմ զանգվածային հարձակումների:

«Ընդամենը հարյուր օր անց կարող եմ ձեզ ասել՝ Ամերիկան վերադարձել է, Ամերիկան կրկին առաջ է գնում», – շեշտել է  նա:

Բայդենի ուղերձի հիմնական թեմաները դարձել են Միացյալ Նահանգների ներքին խնդիրները. տնտեսության խթանման վերաբերյալ հարցերը, ոստիկանության բռնությունների և ռասսայական անարդարությունների դեմ պայքարը, երկրում զենքի շրջանառության կանոնների խստացման խնդիրները:

Բայդենը խնդրել է օրենսդիրներին աջակցել իր նոր հավակնոտ ծրագրի կյանքի կոչման հարցում, որը կոչվում է «Ամերիկյան ընտանիքների նոր ծրագիր», որի արժեքը 1,8 տրիլիոն դոլար է:

Ըստ այդ ծրագրի՝ ԱՄՆ դաշնային կառավարությունը պատրաստվում է 225 միլիարդ դոլար ծախսել երեխաների առողջության պահպանման վրա, ևս 225 միլիարդ ՝ վճարովի ծննդաբերության և հիվանդության արձակուրդը երկարացնելու համար:

200 միլիարդ կարող է հատկացվել չքավորների առողջական ապահովագրությունը վճարելու համար: Նույնքան կարժենա անվճար մանկապարտեզների ստեղծման ծրագիրը։ Սպիտակ տունը պատրաստվում է ծախսել ևս $ 109 միլիարդ դոլար ՝ բոլոր ամերիկացիների համար համայնքային քոլեջներում անվճար երկամյա ուսման վարձ ներդնելով:

Բայդենը հիշեցրել է, որ իր վարչակազմը արդեն Կոնգրես է ներկայացրել ճանապարհային և տրանսպորտային ենթակառուցվածքների վերականգնման մեկ այլ լայնամասշտաբ ծրագիր, որը գնահատվում է 2.3 տրիլիոն դոլար:

Ինչպես և սպասվում էր, Բայդենը մեկ ժամ տևած ելույթում շատ քիչ ժամանակ է հատկացրել արտաքին քաղաքականության հարցերին: Նա անդրադարձել է Չինաստանի հետ Միացյալ Նահանգների տարաձայնություններին և նշել այնպիսի երկրների, որոնց Վաշինգտոնը համարում է Միացյալ Նահանգների հիմնական հակառակորդները ՝ Հյուսիսային Կորեան, Իրանը և Ռուսաստանը:

Միևնույն ժամանակ, Սպիտակ տան ղեկավարը շեշտել է, որ, իր կարծիքով՝ ԱՄՆ-ը համաչափ է պատասխանել Ռուսաստանի իշխանություններին՝ Կրեմլի կողմից ընտրություններին միջամտելու և հակերային հարձակումների համար: «Ինչ վերաբերում է Ռուսաստանին, ես Պուտինին շատ հստակ հասկացրի, որ մենք չենք ձգտում էսկալացիայի, բայց նրանց ձեռնարկած գործողությունները հետևանքներ կունենան», – հայտարարել է ԱՄՆ նախագահը:

Բայդենը հավելել է, որ չնայած երկկողմ հարաբերություններում առկա հակասություններին ՝ Վաշինգտոնը կարծում է, որ նրանք դեռ կարող են համագործակցել Ռուսաստանի հետ զինաթափման և կլիմայի փոփոխության դեմ պայքարի հարցում:

Տաթև Ֆռանգյան