19.05.2026 | 13:43
Շատ լավ հասկանում ենք, ՌԴ-ից չէ որ պետք է ասեն՝ ԵՏՄ և ԵՄ անդամակցությունը անհամատեղելի են․ Միրզոյան․ ՏԵՍԱՆՅՈՒԹ
ԱԺ ՀՀԿ և «Ծառուկյան» խմբակցությունների պատգամավորների գրեթե կեսը խորհրդարանում ոչինչ չի անում
15.02.2018 | 13:00
6-րդ գումարման Ազգային ժողովում պահպանվում է «լուռ» պատգամավորների թիվը: Գործող խորհրդարանը գրեթե նույնությամբ կրկնում է 5-րդ գումարման խորհրդարանի պատկերը:
«Մանդատ» ՀԿ-ի ներկայացրած «ԱԺ մոնիտորինգ» ծրագրի՝ 6-րդ գումարման ԱԺ գործունեության դիտարկման արդյունքներից տեղեկանում ենք, որ 105 պատգամավորից 40-ը 2 նստաշրջանում որևէ քննարկման չի մասնակցել:
31 հոգանոց «Ծառուկյան» խմբակցության 14 պատգամավոր կամ խմբակցության 45%-ը ԱԺ լիագումար նիստերին հարց չի տվել, ելույթ չի ունեցել:
58 հոգանոց ՀՀԿ խմբակցությունում ամբիոնին և խոսափողին չմոտեցած պատգամավորների թիվը 26 է կամ խմբակցության 45 %-ը:
Ընդհանուր առմամբ՝ խորհրդարանի շուրջ 38%-ը (նրանք ճնշող մեծամասնությամբ տարածքային ցուցակներով ընտրված պատգամավորներն են) միայն քվեարկել է, ինչը չի բխում խորհրդարանական կառավարման համակարգի տրամաբանությունից:
Զեկույցի տվյալներով՝ ամենաշատ կողմ քվեարկած խմբակցությունը ՀՀԿ-ն է: Ամենաշատը ձեռնպահ է քվեարկել «Ծառուկյան» խմբակցությունը, ամենաշատ դեմ քվեարկածը «Ելք»-ն է: «Ելք»-ը նաև ամենաակտիվ խմբակցությունն է: «Ելք»-ի պատգամավորներից յուրաքանչյուրը միջինը հնչեցրել է 30 հարց ու ելույթ: «Ծառուկյան» խմբակցության նույն ցուցանիշը 10 է, ՀՀԿ-ական պատգամավորներինը՝ 5, ՀՅԴ-ինը՝ 1:
