02.07.2026 | 02:50
ԱԱ-2026. Բելգիան կամային հաղթանակ տարավ 0:2-ից հետո. ՏԵՍԱՆՅՈՒԹ
Դիմորդներին 2-րդ անգամ քննություն հանձնելու իրավունք կտրվի․ Լևոն Մկրտչյան
Հասարակություն
06.06.2017 | 11:48
Ընդունելության քննության ձևաչափում առաջիկայում փոփոխություններ կլինեն․ այս մասին լրագրողների հետ զրույցում ասել է ՀՀ ԿԳ նախարար Լևոն Մկրտչյանը։
«Շատ են բողոքում, որ երեխաները, ովքեր մասնագիտական նախընտրություն ունեն, հաճախ դուրս են մղվում ավելի բարձր ստացած, բայց մեկ ուրիշ մասնագիտություն ընտրած դիմորդների հետ մրցակցության պատճառով: Ուստի նախատեսում ենք մինչև հոկտեմբեր առաջին հայտի գերակայության սկզբունքը պահել` առաջինը կանցնեն նրանք, ովքեր առաջին հայտով իրենց նախընտրած մասնագիտությամբ համապատասխան միավոր են ստացել, և նոր միայն մյուսները կանցնեն` թափուր տեղի առկայության դեպքում»,- բացատրել է Մկրտչյանը:
Երկրորդ կարևոր փոփոխությունը կլինի այն, որ դիմորդները հնարավորություն կունենան նույն առարկայից երկրորդ անգամ քննություն հանձնել:
«Երկրորդ, մենք մտածում ենք տարվա մեջ երկու անգամ քննություն կազմակերպել, այսինքն՝ յուրաքանչյուր երեխա հնարավորություն կստանա երկու անգամ քննություն տալ, որովհետև կարող է հուզված լինել և չկարողանալ լավ հանձնել քննությունները: Այս դեպքում պետք է անցկացնել TOEFL-ի տիպի քննություններ։ Կարծում եմ՝ հնարավոր է իրականացնել այդ նորամուծությունը: Երրորդ, վճարովի և անվճարի տեղերի մրցույթը պետք է առանձնացնել»,- ասել է նախարարը:
Նախարարը նշել է, որ պետք է փորձեն մինչև հոկտեմբեր կյանքի կոչել այս փոփոխությունը, որպեսզի այն տարածվի հաջորդ տարվա դիմորդների վրա, իսկ եթե չհասցնեն, ապա կիրականացնեն հաջորդ տարի:
