Քաղաքականություն
06.06.2017 | 11:17
ԱՄՆ նախագահ Դոնալդ Թրամփը կրկին ընդգծել է որոշ «վտանգավոր» երկրների քաղաքացիների մուտքը ԱՄՆ ժամանակավորապես արգելելու անհրաժեշտությունը, հաղորդում է РИА Новости-ն:
«Այո՛, մենք պետք է հստակ արգելք սահմանենք որոշ «վտանգավոր» երկրների քաղաքացիների մուտքի հարցում, այլ ոչ թե քաղաքական ինչ-որ կոռեկտ տերմին գործածենք, որը չի օգնի պաշտպանել մեր քաղաքացիներին»,- Twitter-ի իր էջում գրառել է Թրամփը։
Հիշեցնենք, որ Թրամփը մարտի 6-ին ստորագրել էր միգրացիոն նոր հրամանագիր, ըստ որի՝ ԱՄՆ մուտքի ժամանակավոր արգելք էր սահմանում Մերձավոր Արևելքի և Հյուսիսային Աֆրիկայի վեց երկրների՝ Սուդանի, Սիրիայի, Իրանի, Լիբիայի, Սոմալիի և Եմենի քաղաքացիների համար, որոնք, ըստ ԱՄՆ տվյալների, աջակցում են ահաբեկչական խմբավորումներին կամ նրանց ապաստան են տրամադրում։
Նման բովանդակությամբ առաջին հրամանագիրը Թրամփը ստորագրել էր հունվարի 27-ին, այսինքն՝ երդմնակալությունից մեկ շաբաթ անց: Այդ «սև ցուցակում» թվարկվում էր 7 պետություն՝ այդ թվում Իրաքը, որը երկրորդ տարբերակում հանվել է ցուցակից:
Նշենք նաև, որ Թրամփի այդ քայլը բողոքի տեղիք տվեց ու ԱՄՆ մի շարք դաշնային դատարաններ ժամանակավորապես կասեցրին հրամագրի իրագործումը: Սակայն նախորդ շաբաթ Սպիտակ տունը պաշտոնապես դիմեց Գերագույն դատարան՝ խնդրելով վերականգնել ներգաղթը ժամանակավորապես արգելող հրամանագրի գործողությունը։
