11.10.2026 | 14:46
Այսօր աղջիկ երեխաների միջազգային օրն է
Ինչպես Թուրքիան համաշխարհային առաջատար դարձավ Covid-19-ի տարածման դեպքերով․ համաճարակը դուրս է եկել վերահսկողությունից․ DW
Քաղաքականություն
23.04.2021 | 20:13
Անցած մի քանի շաբաթների ընթացքում Թուրքիայում կտրուկ վատթարացել է համաճարակաբանական իրավիճակը. ապրիլի 22-ի դրությամբ, նախորդ 1 օրվա ընթացքում Թուրքիայում հայտնաբերվել է կորոնավիրուսային վարակի 54 791 դեպք, 354 մարդ մահացել է հիվանդության պատճառով, գրում է DW-ի ռուսական ծառայությունը։
Վերջին 7 օրվա ընթացքում երկրում վարակման միջին մակարդակը հասել է 500 դեպքի 100000 բնակչի հաշվով. սա մոտ երեք անգամ ավելին է, քան Գերմանիայում: Առանձնապես մտահոգիչ է իրավիճակը Թուրքիայի ամենամեծ քաղաքում ՝ Ստամբուլում, որտեղ այս ցուցանիշն արդեն գերազանցել է 900-ը:
Շատերը կատարվածի մեջ մեղադրում են Թուրքիայի կառավարությանը: Մարտի 1-ին իշխող իսլամական պահպանողական Արդարություն և զարգացում կուսակցության ( AKP) ղեկավարությունը մեղմացրեց սահմանափակումները ՝ հակառակ գիտնականների և բժիշկների առաջարկությունների: Թուրքիայում սրճարաններն ու ռեստորանները վերաբացվեցին, իսկ երեկույթները թույլատրվեցին:
Այդ որոշման հետևանքները իրենց երկար սպասել չտվեցին․ այդ օրվանից կորոնավիրուսով վարակվածների թիվը մեծացել է առնվազն 5 անգամ․ մարտի 1-ին դրությամբ վարակման թվի օրական աճը չի գերազանցել 10 000 դեպքը։
«Սա նշանակում է, որ համաճարակը դուրս է եկել վերահսկողությունից»,- փաստում է Թուրքիայի բժշկական ասոցիացիայի ներկայացուցիչ Նասիր Նեսանիրը։
Ըստ նրա՝ իշխանությունների որոշումները ոչ մի գիտական հիմք չունեն, իսկ բժշկական կազմակերպությունների կարծիքներն արհամարհվել են։ «Այժմ դրա համար ստիպված են վճարել շարքային քաղաքացիներն ու բժիշկները»,- ասել է Նեսանիրը։
Ընդդիմությունը ևս մեղադրում է իշխող «Արդարություն ու զարգացում» կուսակցությանը համաճարակի դեմ պայքարում երկակի ստանդարտների մեջ, մասնավորապես նրանում, որ երկրի նախագահ Ռեջեփ Թայիփ Էրդողանը և նրա կուսակցությունը բազմաթիվ համագումարներ են կազմակերպել: Այդ ժամանակից ի վեր, կորոնավիրուսային վարակի նոր դեպքերի թիվը դրանց անցկացման վայրերում է՛լ ավելի արագ է աճել:
Տաթև Ֆռանգյան
