Մխիթար Հայրապետյանն ընդունել է Լիբանանի երիտասարդության և մարմնակրթության նախարար Վարդինե Օհանյանին

Այսօր ՀՀ ազգային ժողովում Աժ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանն ընդունել է Հայոց ցեղասպանության 106-րդ տարելիցին նվիրված հիշատակի արարողություններին մասնակցելու նպատակով Հայաստան ժամանած՝ Լիբանանի նախագահ Միշել Աունի հատուկ ներկայացուցիչ, Լիբանանի երիտասարդության և մարմնակրթության նախարար Վարդինե Օհանյանին:

Հանդիպմանը մասնակցում էին Աժ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի անդամներ Հակոբ Ասլանյանը, Արթուր Մանուկյանը, Լիլիթ Ստեփանյանը, Հայաստանում Լիբանանի արտակարգ և լիազոր դեսպան Մայա Դաղերը և Լիբանանում ՀՀ արտակարգ և լիազոր դեսպան Վահագն Աթաբեկյանը։ Իր խոսքում Մխիթար Հայրապետյանը, նախ, շնորհակալություն է հայտնել նախագահ Աունին՝ իր հարգանքի տուրքը մատուցելու Հայոց ցեղասպանության անմեղ նահատակների հիշատակին և ընդգծել, որ Լիբանանի խորհրդարանը դեռևս 1997թ․ հատուկ բանաձևով ճանաչել է Հայոց ցեղասպանությունը։ Առանձնահատուկ անդրադարձ է կատարել այն փաստին, որ Հայոց ցեղասպանությունից մազապուրծ եղած մեր հայրենակիցները, շնորհիվ Լիբանանի ժողովրդի, կարողացան հանգրվան գտնել Լիբանանում և որ Լիբանանը, իրավամբ, երկրորդ հայրենիք է հանդիսանում նրանց համար։

Տիկին Օհանյանը, իր հերթին, փոխանցել է Լիբանանի նախագահի ջերմ ողջույնները և զորակցությունը, հատուկ ընդգծել է երկու պետությունների և ժողովուրդների միջև հաստատված դարավոր բարեկամությունը և սերտ համագործակցությունը։ Քննարկվել է հայ-լիբանանյան համագործակցության հարցերի լայն շրջանակ։ Երկուստեք վերահաստատվել է պատրատասկամությունը՝ քայլեր ձեռնարկելու տարբեր բնագավառներում, մասնավորապես, կրթության, սպորտի, մշակույթի և երիտասարդության ոլորտներում հարաբերությունների առավել զարգացման և խորացման ուղղությամբ։