18.02.2026 | 23:28
Ստեփանծմինդա-Լարս ավտոճանապարհը փակ է
Ոստիկանություն-ԱԱԾ համագործակցության հերթական արդյունքը. երկու տղամարդ կալանավորվել է․ ՏԵՍԱՆՅՈՒԹ
Հասարակություն
20.04.2021 | 16:19
Ազգային անվտանգության ծառայությունում օպերատիվ տվյալներ ստացվեցին, որ 31 և 30 տարեկան երևանցի երկու երիտասարդ, հանցակից այլ անձանց հետ, պարբերաբար գողություններ են անում մայրաքաղաքի առևտրի կենտրոններից, այլ կերպ ասած՝ մոլերից:
Օպերատիվ աշխատանքին միացան նաև քրեական ոստիկանության գլխավոր և Երևան քաղաքի վարչությունների ծառայողներ: Օպերատիվ-հետախուզական տվյալներն ամբողջացան: Պարզվեց, որ երիտասարդները ստեղծել են կազմակերպված խումբ, ներառել են կանանց ու անչափահասների, նաև ձեռք են բերել ապրանքն ապակոդավորելու հատուկ սարքավորումներ, և արդեն տևական ժամանակ, նախօրոք դերաբաշխում կատարելով, տարբեր մոլերից գողացել են հագուստ ու այլ իրեր:
Կազմակերպված խմբի կողմից գողության հատկանիշներով հարուցվեց քրեական գործ: Ապրիլի 13-ը հանգուցալուծման օրն էր: Հերթական գողությունները կատարելուց անմիջապես հետո Երևանի Արշակունյաց-Գրիգոր Լուսավորչի փողոցների խաչմերուկից բերման ենթարկվեցին կազմակերպիչներից մեկն ու հանցավոր խմբի անդամ, դեռևս անչափահաս մի պատանի` իր վարած «Օպել» մակնիշի մեքենայով:
Նույն ժամին Ծիծեռնակաբերդի խճուղուց բերման ենթարկվեցին մյուս կազմակերպիչն ու խմբի մեկ այլ անդամ` 34-ամյա մի տղամարդ` իր վարած «ԲՄՎ»-ով:
Ավտոմեքենաների խուզարկությամբ հայտնաբերվել են առևտրի կենտրոններից հափշտակված մեծ քանակի հագուստ և այլ իրեր:
Կազմակերպիչները կալանավորված են: Նախաքննությամբ հանգամանքները պարզվում են:
