Վարչապետը ժամանակին չի հերքել Օնիկ Գասպարյանին՝ հնարավորություն տալով շտկել սխալները. Հ. Հակոբյան. ՏԵՍԱՆՅՈՒԹ

Ի պատասխան ՀՀ Զինված ուժերի գլխավոր շտաբի նախկին պետ Օնիկ Գասպարյանի նոյեմբերի 17-ի հայտարարության՝ Անվտանգության խորհրդի գրասենյակը գաղտնազերծված փաստաթուղթ է հրապարակել, որն ապացուցում է խորհրդարանում վարչապետի՝ ապրիլի 14-ին ասած խոսքերը, երբ նա նշեց, որ Օնիկ Գասպարյանը չի ասել, թե անհրաժեշտ է 3-4 օրվա ընթացքում պատերազմը կանգնեցնել, այլ հակառակը՝ ասել է՝ «ոչ մի քայլ հետ» սկզբունքով շարժվում են առաջ և հաջողություններ գրանցում:

Factor.am-ի հետ զրույցում անդրադառնալով հարցին, թե որքանով կարող է հանրությունը վստահ լինել, որ այդ փաստաթուղթն իրական է, «Իմ քայլը» խմբակցության պատգամավոր Հրաչյա Հակոբյանը պատասխանեց. «Կարծում եմ՝ հանրության մոտ կասկածներ չկան: Որոշ շրջանակներ կասկածներ ունեն, և այդ շրջանակներն ինչ ապացույց էլ ի հատ գա, կարող են այն համարել կեղծ, եթե հետագայում ձայնագրություն էլ լինի, կարող են համարել մոնտաժված: Նրանք որևէ կերպ չեն համարելու, որ ստացան իրենց կասկածի սպառիչ պատասխանը: Որքանով տեղյակ եմ՝ Էդմոն Մարուքյանը հնչեցրել է այդպիսի կասկածներ և նրան հրավիրել են, որ ծանոթանա նաև այլ փաստերի ևս, և նա հրաժարվել է»:

Անդրադառնալով դիտարկմանը, որ վարչապետ Նիկոլ Փաշինյանը «Ազատություն» ռադիոկայանի հետ զրույցում չի հերքել, որ Օնիկ Գասպարյանը պատերազմի 4-րդ օրն ասել է՝ պետք է կանգնեցնել պատերազմը, և նշել է, որ դրանից հետո այլ իրողություններ եղան, նոր սպառազինություն ձեռք բերվեց, բայց ամիսներ անց խորհրդարանում նա նշել է, որ Օնիկ Գասպարյանը ստում է, Հրաչյա Հակոբյանը նշեց. «Այն, որ այն ժամանակ չի հերքել, միգուցե չի համարել, որ ճիշտ ժամանակն է դրա մասին խոսելու և հնարավորություն է տվել ռազմական ղեկավարությանը՝ շտկելու իրենց սխալները»:

Մանրամասները՝ տեսանյութում: