Պատերազմից հետո անասնական վախ էր սեփական ժողովրդից, փակվել էին ու վախենում էին զանգերին պատասխանել․ Գորգիսյանը՝ իշխանությունների մասին. ՏԵՍԱՆՅՈՒԹ

Տեղին կլիներ, եթե կառավարության 2020 թվականի ծրագրի կատարողականի մեջ լիներ միայն մեկ տող՝ կներեք, մենք տապալեցինք ու ձախողեցինք 2020 թվականը: Այս մասին այսօր՝ ԱԺ-ում կառավարության կատարողականի քննարկման ժամանակ հայտարարեց «Լուսավոր Հայաստան» խմբակցության քարտուղար Գևորգ Գորգիսյանին:

«Բայց այս կառավարությունն ունեցավ բավարար պնդերեսություն ներկայացնելու մի ծավալուն զեկույց այն մասին, թե ինչպես էին իրենք քաջաբար պայքարում սեփական տկարության, ապիկարություն, գոռոզության, սնապարծության, հպարտության դեմ և այդ պայքարում պարտվեց Հայաստանը: Պարտվեց, որովհետև կառավարությունն առաջին տեղ բերեց PR-ը, երկրորդ տեղում թողնելով բովանդակությունը: Նրանք  գերադասեցին 50 դոլարով Եվոպա թռչելու PR-ը Կովիդի դեմ պայքարից, գերադասեցին ռազմական գնումներ անել այնպես, որ նոր տեխնիկան բերել ու սելֆիներ անել, որ PR-վեն: Արդյունքում վատնվեց հավատը»,-հայտարարեց նա:

Գորգիսյանը, անդրադառնալով Կառավարության ծրագրի 2020-ի կատարողականին, ասաց՝ 2018-ի հեղափոխությունը երկրին առաջին հերթին վաղվա օրվա հանդեպ հավատ էր տվել: «Բայց դա ամբողջությամբ վատնվեց: Վատնվեց հավատը հենց առաջին հերթին վաղվա օրվա համար, հավատը քաղաքական դաշտի մասին, պետական մարմինների ու ՀՀ-ի նկատմամբ: Չգիտեմ՝ քանի իշխանափոխություն ու քանի սերունդ է դեռ պետք լինելու փոխել, որ մենք այս հավատը որևէ կերպ կարողանանք վերականգնել, բայց այս կառավարությունը մինչև այսօր շարունակում է պայքարել հողմաղացների դեմ»:

Պատգամավորը նշեց, որ 2020-ը ճգնաժամի տարի էր, բայց ճգնաժամերը գալիս են մեզ փորձելու համար՝ մեր թուլությունները ցույց տալու, մեր թերացումները բացահայտելու:

«Ճգնաժամից ուժեղացած դուրս գալու համար պետք է ազնիվ լինել, առաջին հերթին՝ ազնիվ լինենք ինքներս մեզ հետ, պետք է տեսնենք այն թերությունները, որ կան: Պետք է ընդունենք թերությունների գոյությունը, կարողանանք ապաքինվել, իսկ դրա համար առաջին հերթին պետք է ընդունենք, որ գոյություն ունի հիվանդություն, ու պատրաստ լինենք խորապես ծանոթանալ այդ հիվանդությանը, ախտորոշել հիվանդությունը, որպեսզի ճիշտ բուժել…

Մինչդեռ Կառավարությունը փորձելով քողարկել եղած խնդիրները, ավելի է խորացնում դրանք: Ես նայում եմ վարչապետին, իշխանության պատգամավորներին ու  նրանց խոսքում չեմ տեսնում մեղքի զգացողության մի նշույլ: Այն ամբարտավանությունը, որ ունեին պատերազմից առաջ, մի պահ դադարեց պատերազմից հետո: Պարզվեց, որ դա ոչ թե գիտակցումն է խնդիրների, այլ անասնական վախը սեփական ժողովրդից, երբ մարդիկ փակվել էին տներում ու վախենում էին տնից դուրս գալ, վախենում էին զանգերին պատասխանել: Վախը անցավ և մարդիկ վերադարձան իրենց բնորոշ հոխորտացող կեցվածքին: Այս կառավարության հետ Հայաստանը չունի առաջ գնալու որևէ հույս, որևէ հնարավորություն, որովհետև կառվարությունը չի ուզում գիտակցել առկա խնդիրների խորությունը, չի ուզում ընդունել սեփական մեղքը»,- ընդգծեց Գորգիսյանը:

Մանրամասները՝ տեսանյութում: