Օսիկյանին ազատել են նախագահին մոտ անձին հետևելու պատճառո՞վ

ՔԿՎ նախկին պետ Արթուր Օսիկյանի անսպասելի և առեղծվածային պաշտոնաթողությունը այս կառույցի աշխատակիցների մասնավոր զրույցներում հաճախ արծարծվող թեմա է: Մի «նուրբ» վարկած է շրջանառվում գեներալների շրջանում, որի համաձայն՝ Օսիկյանը հեռացվել է անձնական բնույթի ինտրիգի հետևանքով:

Գեներալ Օսիկյանը, ըստ շրջանառվող լուրերի, դիմել է ոստիկանության օպերատիվ փնտրողական վարչության պետ, իր վաղեմի բարեկամ Աշոտ Ավագյանին՝ խնդրելով նրան հետևել մի անձնավորության, որի վարքը իրեն կասկածելի է թվացել: Հանձնարարությունը կատարվել է բավականին անփույթ ձևով: Դուրս են եկել ՀՀ նախագահի վերահսկողական ծառայության պետ Հովհաննես Հովսեփյանի վրա, որը նկատել է, որ իրեն հետևում են:

ՔԿՎ մոտ կանգնած լավատեղյակ աղբյուրից մեզ հասած տեղեկություններով, Հովսեփյանը գանգատվել է ՀՀ նախագահին: Պետական ծառայությունն անձնական նպատակներով օգտագործելը դիտարկվել է որպես անասելի հանդգնություն, և նախագահը արագ որոշում է ընդունել ազատել Օսիկյանին զբաղեցրած պաշտոնից:

ՔԿՎ մեր աղբյուրի համաձայն, այժմ այս ինտրիգը՝ Հովհաննես Հովսեփյանի և Արթուր Օսիկյանի անձնական հողի վրա կոնֆլիկտը, ակտիվ քննարկվում է կոնկրետ «շրջանակներում», և քննարկումներն ի վնաս Արթուր Օսիկյանի են: Վերջինս հեռախոսազանգերի չէր պատասխանում, և մենք փորձեցինք ճշտել տեղեկությունները մամուլի պատասխանատուներից:

Քրեակատարողական վարչությունից հայտնեցին, որ իրենց այս հարցով դիմելը ճիշտ չէ. Արթուր Օսիկյանն արդեն ազատվել է աշխատանքից, և իրենք որևէ հարցի պատասխանել իրավասու չեն: Իսկ ոստիկանությունից հայտնեցին, որ այս պատմությունը նման է հեքիաթի: Ոստիկանության պնդմամբ՝ օպերատիվ փնտրողական վարչությունն աշխատում է խիստ հրահանգավորված եղանակով, անձանց նկատմամբ դիտարկումները իրականացնում է միայն գրավոր փաստաթղթերի, դատարանի որոշումների հիման վրա, և այս կառույցն անձնական նպատակների համար ծառայեցնելն անհնար է:

Մեր իրականությունում, սակայն, քիչ չեն եղել դեպքերը, երբ պետական լծակները ծառայեցվել են զուտ անձնական նպատակների համար: Մենք մի քանի անգամ փորձեցինք կապ հաստատել նաև այս պատմության երկրորդ հերոսի՝ Հովհաննես Հովսեփյանի հետ, բայց մեր զանգերը մնացին անպատասխան:

Սյուզան Սիմոնյան