Ռուսաստանում պատրաստվում են թուրքերի հետ համատեղ «Բայրաքթար» անօդաչու թռչող սարքեր արտադրել

Թուրքական Baykar Defense ընկերությունը, որը Bayraktar TB2 անօդաչու թռչող սարքեր արտադրող Baykar ընկերությունների խմբի կազմում է, համագործակցության պայմանագիր է կնքել ռուսական Նիժնի Նովգորոդի «Նոր անօդաչու համակարգեր» ընկերության հետ՝ թուրքական «Բայրաքթար» անօդաչու սարքերի համատեղ արտադրության կազմակերպման համար։ Այս մասին հաղորդում են ինչպես ադրբեջանական լրատվամիջոցները, այնպես էլ ռուսական «Ռազմավարությունների ու տեխնոլոգիաների վերլուծության» կենտրոնի բլոգը՝ վկայակոչելով Թուրքիայի ավիացիոն արդյունաբերության կողմից հրատարակվող «Türk Havacılık Haberleri ve Diğer Canavarlar»ամսագրին։

Նշվում է, որ «Նոր անօդաչու համակարգեր» ընկերությունը նոր ու դեռևս անհայտ խաղացող է ռուսական պաշտպանական ոլորտում, սակայն ոչ պաշտոնական աղբյուրներն այդ կազմակերպությունը կապում են «ՌԴ նախագահ Վլադիմիր Պուտինին մերձավոր օլիգարխներից մեկի հետ»։

Ենթադրվում է, որ գործարքի ռուս նախաձեռնողները փորձում են «Բայրաքթարներն» առաջարկել ՊՆ-ին կամ ռուսական այլ ուժային կառույցներին՝ որպես այլընտրանք ռուսական բավական դանդաղ զարգացող այդ դասի ԱԹՍ ծրագրերին։ Ըստ հրապարակման՝ խոսքը գնում է «Կորսար» անօդաչուների մասին։

Հաղորդվում է, որ համագործակցության պայմանագիրը կնքվել է դեռ 2020 թվականի ամռանը։ Նշվում է նաև, որ Baykar Defense ընկերության ղեկավարությունը որոշակի «դիվանագիտական հմտություններ» է ցուցաբերում, քանի որ միաժամանակ Ուկրաինայի համար է մեծ պատվեր կատարում։

Էմմա Չոբանյան