Նախագահից ներման իրավունքը վերցվում է և տրվում վարչապետին. ԱԺ-ն քննարկում է «Ներման մասին» օրինագիծը

Արդարադատության փոխնախարար Սուրեն Քրմոյանն այսօր Ազգային ժողովի արտահերթ նիստում ներկայացրեց «Ներման մասին» օրենքի նախագիծ, որն ուժի մեջ է մտնելու Հայաստանի չորրորդ նախագահի պաշտոնավարման օրվանից:

«Ներման մասին» նոր օրենքը կարգավորում է դատապարտյալների ներման, ներման խնդրագրերի ներկայացման և քննարկման, ինչպես նաև ներման հրամանագրերի կատարման նկատմամբ վերահսկողության իրականացման հետ կապված հարաբերությունները:

Ըստ օրինագծի՝ ներման խնդրագիր կարող է ներկայացնել բացառապես դատապարտված անձը: Սակայն կարող են լինել միջնորդություններ փաստաբանների ու հարազատների կողմից: «Նախագահին ներման հետ կապված առաջարկություն է ներկայացնելու Հայաստանի վարչապետը, ուզում եմ հատուկ նշել, որ Սահմանադրության պահանջ է, որպեսզի լինի մարմին կամ պաշտոնատար անձ, որն այդ առաջարկությամբ հանդես է գալու»,- նշեց հարցի հիմնական զեկուցող արդարադատության փոխնախարար Սուրեն Քրմոյանը:

ԱԺ «Ելք» խմբակցության պատգամավոր Էդմոն Մարուքյանը Արդարադատության փոխնախարարից հետաքրքրվեց՝ քննարկվե՞լ են արդյոք այն առաջարկները, որոնք ներկայացվել են պետաիրավական և մարդու իրավունքների մշտական հանձնաժողովում տեղի ունեցած քննարկումից հետո:

«Նախագահից ներման իրավունքն, ըստ էության, վերցվում է և տրվում վարչապետին: Սահմանադրությամբ ասվում է, որ նախագահը լուծում է դատապարտյալին ներում շնորհելու հարցը, և այն հիմա տրված է վարչապետին»,- նշեց Մարուքյանը:

Նա նաև ընդգծեց՝ պետք է ներման հրամանագրերը լինեն հրապարակային. «Հանրությունը պետք է հասկանա՝ ովքեր և ինչ հանգամանքում են ներում ստացել, որովհետև հաճախ թերթերից ենք իմանում, ում է ներում շնորհվել»:

Արդարադատության փոխնախարար Սուրեն Քրմոյանը պնդեց՝ նախագահից լիազորություն չի վերցվում. «Այդ լիազորությունները սահմանված են Սահմանադրությամբ, այսինքն՝ 139 հոդվածը նախատեսում է՝ պարտադիր պետք է լինի առաջարկություն ներկայացնող մարմին, և, ըստ այդմ, որոշվել է, որ պառլամենտական համակարգում այդ մարմինը պետք է լինի ՀՀ վարչապետը»:

Մանրամասները՝ տեսանյութում:

Շողիկ Գալստյան