01.06.2026 | 22:39
Ադրբեջանում քաղաքական բանտարկյալների օր սահմանելու նախաձեռնությամբ են հանդես եկել
Կրեմլի պնդմամբ՝ Կիևը հրաժարվել է «սուրբծննդյան զինադադարից»
Քաղաքականություն
12.12.2024 | 18:49
Կրեմլը, Հունգարիայի վարչապետ Վիկտոր Օրբանից հետո, նույնպես հայտարարել է Կիևի կողմից «սուրբծննդյան զինադադարից» հրաժարվելու մասին, գրում է BBC-ի ռուսական ծառայությունը։
«Հունգարիայի վարչապետ Վիկտոր Օրբանը նախօրեին նախագահ Պուտինի հետ հեռախոսազրույցի ժամանակ առաջարկել է Սուրբ Ծննդի նախօրեին Ռուսաստանի և Ուկրաինայի միջև գերիների խոշոր փոխանակում իրականացնել, ինչպես նաև Սուրբ Ծննդյան զինադադար հայտարարել։ Նույն օրը ՌԴ ԱԴԾ-ն գերիների փոխանակման մեր առաջարկները ներկայացրեց Մոսկվայում Հունգարիայի դեսպանատուն, սակայն, դատելով սոցիալական ցանցերում Զելենսկիի, ինչպես նաև նրա շրջապատի արձագանքից, ուկրաինական կողմը մերժել է Օրբանի բոլոր առաջարկները»,- լրագրողներին ասել է Կրեմլի խոսնակ Դմիտրի Պեսկովը։
Նախօրեին Օրբանն ասել էր, որ առաջարկել է Ուկրաինային հրադադար հաստատել Ռուսաստանի հետ Սուրբ Ծննդյան կապակցությամբ և իրականացնել ռազմագերիների լայնածավալ փոխանակում, սակայն Ուկրաինայի նախագահ Վլադիմիր Զելենսկին, իբր, մերժել է այդ գաղափարը։
«Մենք առաջարկել ենք սուրբծննդյան զինադադար և լայնածավալ գերիների փոխանակում: Ցավալի է, որ նախագահ Զելենսկին այսօր հստակորեն մերժել և բացառել է դա։ Մենք արեցինք այն ամենը, ինչ կարող էինք»,- գրել է Վիկտոր Օրբանը X-ում:
Սա նրա պատասխանն էր Զելենսկիի թվիթին, որը վերաբերում էր Պուտինի հետ Օրբանի զրույցին:
«Մենք բոլորս հուսով ենք, որ Վիկտոր Օրբանը գոնե Մոսկվայում հեռախոսով չի զանգի Ասադին՝ լսելու նրա մեկ ժամանոց դասախոսությունները»,- գրել էր Զելենսկին։
Թարգմանությունը՝ Տաթև Ֆռանգյանի
