Քաղաքականություն
29.03.2021 | 14:23Հայաստանում ադրբեջանցի ռազմագերի չկա. Հայաստանը կատարել է իր մարդասիրական պարտավորությունը և հանձնել բոլոր ռազմագերիներին: ԱԺ եվրոպական ինտեգրման հարցերի հանձնաժողովի արտահերթ նիստի ժամանակ հայտնեց ՀՀ արտաքին գործերի նախարար Արա Այվազյանը` ի պատասխան հանձնաժողովի անդամ Նաիրա Զոհրաբյանի հարցին։
Զոհրաբյանը հետաքրքրվեց, թե կան արդյո՞ք ադրբեջանցի գերիներ ՀՀ-ում և եթե չկան, ինչի՞ դիմաց ենք կառուցողական դաշտ բերելու Ադրբեջանին, որպեսզի իր պարտավորությունները կատարի և մեր 188 գերիներին վերադարձնի։
«Հայ գերիների թիվը, որ նշեցիք, ուզում եմ հստակեցնել, որ մեր գերիների թիվը 188 չէ. այդ թիվը նշվել է Մարդու իրավունքների եվրոպական դատարանի կողմից, և դատարանը տեղեկություններ է պահանջել այդքան անձի առնչությամբ։ Մեր գերիների թիվը տարբեր է, սակայն ես հիմա այդ թիվը չեմ հնչեցնի»,- ասաց Այվազյանը։
Նախարարը նշեց, որ միջազգային ճնշումն Ադրբեջանի նկատմամբ աճում է, և ճնշման արդյունքում Ադրբեջանը հասկացել է, որ գերիների վերադարձը կլինի շատ կարևոր քայլ վստահության մթնոլորտի վերաձևավորման և վերահաստատման գործում։
