30.06.2026 | 18:30
Հայաստանի և Վրաստանի ՆԳ նախարարները քննարկել են երկկողմ համագործակցության ու տարածաշրջանային խաղաղության հարցեր
Ինչպես է Բայդենի վարչակազմը պատրաստվում լուծել միգրանտների աննախադեպ մեծ հոսքի հետ կապված խնդիրը
Քաղաքականություն
23.03.2021 | 21:49
«Ամերիկայի ձայն»-ը գրում է՝ այսօր, երբ Մեքսիկայի հետ սահմանի մոտ խտանում են միգրանտների շարքերը, Ջո Բայդենի վարչակազմը կանգնում է արագ քայլեր իրականացնելու պարտավորության առջեւ:
Ինչպես ԱՄՆ-ի ներքին գործերի նախարար Ալեհանդրո Մայորկասն է ասում, իրենք ուզում են, որ մարդիկ իմանան, որ սահմանը բաց չէ:
Կոչ, որը հնչում է այն պահին, երբ անցած քսան տարիների ընթացքում կուտակումները սահմանին գրանցում են աննախադեպ բարձր ցուցանիշ: Հիշեցնելով համավարակի հետ կապված սահմանափակումները` վարչակազմը շեշտում է, որ այս պահը սահմանը հատելու համար ամենաանհարմար ժամանակն է: Սահմաններից այս պահին հետ են ուղարկվում նախ եւ առաջ միայնակ չափահաս անձինք: Առանց մեծահասակների ուղեկցության ԱՄՆ-ի սահմաններ հասած անչափահասները տեղավորվում են հատուկ խնամքի կենտրոններում:
Նախատեսվում է շուտով կառուցել միգրանտների համար կեցության ժամանակավոր կացարաններ, որոնք Թրամփի օրոք ապամոնտաժվել էին:
Սահմաններում մեծ կուտակումների համար հանրապետականները մեղադրում են նախագահ Ջո Բայդենին, որը չեղարկել է միգրանտներին մինչեւ օրինական մուտքի արտոնագիր տալը Մեքսիկայի տարածքում թողնելու նախկին նախագահ Թրամփի ընդունած որոշումը:
Երեխաները հսկողության տակ կարող են գտնվել մինչեւ 72 ժամ, որից հետո պիտի տեղափոխվեն միայն երեխաների համար նախատեսված կացարաններ: Անցած մեկ շաբաթվա ընթացքում այստեղ բացվել են նման երեք նոր կացարաններ: Սակայն իշխանությունները տեղեկություններ չեն հաղորդում այն մասին, թե քանի նոր կացարան եւ որքան ժամանակում են դրանք կառուցվելու, երբ ԱՄՆ-Մեքսիկա սահմանին միգրանտների ալիքն աստիճանաբար աճում է:
