ԱՄՆ Սենատի՝ արտաքին հարաբերությունների հանձնաժողովի նախագահ, սենատոր Բոբ Մենենդեսն այսօր իր 37 գործընկերների հետ դիմել է նախագահ Բայդեն վարչակազմին՝ հայ ժողովրդի դեմ Օսմանյան կայսրության ցեղասպանությունը պաշտոնապես ճանաչելու հարցում ԱՄՆ Կոնգրեսին միանալու խնդրանքով․ հայտնում է armeniancouncil.org-ը։
Մինչ օրս՝ ԱՄՆ-ի ոչ մի նախագահ չի պահանջել հաստատել պատմական փաստերը, որոնք վերաբերում են Հայոց ցեղասպանությանը ( որը տևել է 1915-1923 թվականներին և հանգեցրել մոտ 2 միլիոն հայերի բռնի տեղահանմանը և 1․5 միլիոնի դաժան սպանությանը):
«Մենք միանում ենք Միացյալ Նահանգների և աշխարհի հայ համայնքին՝ հարգելու այս զոհերի հիշատակը, և մենք կտրականապես դեմ ենք այն փորձերին, որով ձևացնում են, թե հայ ժողովրդին ոչնչացնելու այս կանխամտածված, կազմակերպված ջանքերը ոչ թե ցեղասպանություն են, այլ մեկ այլ բան», – նշել է Մենենդեսը:
Սենատորները նախագահ Բայդենին ուղղված նամակում գրել են. «Դուք ճիշտ եք հայտարարել, որ ամերիկյան դիվանագիտությունը և արտաքին քաղաքականությունը պետք է արմատավորվեն մեր արժեքների մեջ՝ ներառյալ համընդհանուր իրավունքների հարգումը: Այդ արժեքները մեզնից պահանջում են ընդունել ճշմարտությունը և անել հնարավորը՝ կանխելու հետագա ցեղասպանությունները և մարդկության դեմ ուղղված այլ հանցագործություններ»:
Օսմանյան կայսրության կողմից հայերի սիստեմատիկ բնաջնջման փաստերը ճանաչելուց բացի, սենատորները շեշտել են, որ այդ քայլը շտկելու է գործադիր իշխանության դիրքորոշումը ցեղասպանության վերաբերյալ `այն համապատասխանեցնելով Կոնգրեսի կոնսենսուսին, ինչպես նաև նախագահ Բայդենի նախորդ դիտողություններին:
Սենատորները հավելել են, որ երկու կուսակցությունների վարչակազմերը լռում են Հայոց ցեղասպանության ճշմարտության վերաբերյալ: «Մենք ձեզ հորդորում ենք խախտել մեղսակցության այս օրինաչափությունը՝ պաշտոնապես ճանաչելով, որ Հայոց ցեղասպանությունը «Ցեղասպանություն» է»։
