«Ծառուկյան» խմբակցությունը միացավ «Ելք»-ի ստորագրահավաքին. թանկացումների հարցով արտահերթ նիստ կհրավիրվի

ԱԺ «Ելք» խմբակցության ղեկավար Նիկոլ Փաշինյանն այսօր ԱԺ հերթական նստաշրջանի մեկնարկին հանդես եկավ արտահերթ նիստ անցկացնելու առաջարկով:

«Տեղյակ եք՝ Հայաստանում ծավալվում են լայն սպառման ապրանքների թանկացումներ, որը կապված է Հարկային օրենսգրքի հետ: Առաջարկում ենք փետրվարի 16-ին՝ ժամը 11:00-ին հրավիրել արտահերթ նիստ՝ Հարկային օրենսգրքում մի շարք փոփոխություններ իրականացնելու համար»,- նշեց Փաշինյանը:

Ատահերթ նիստ հրավիրելու համար անհրաժեշտ է 27 պատգամավորի ստորագրություն: Փաշինյանն ասաց՝ «Ելք»-ը ստորագրում է նախաձեռնության տակ, ապա կոչ արեց պատգամավորներին միանալ իրենց: «Ծառուկյան» խմբակցությունից ԱԺ փոխնախագահ Միքայել Մելքումյանը հայտարարեց, որ միանում են «Ելք»-ի նախաձեռնած ստորագրահավաքին:

««Եկամտահարկի մասին» օրենքը և «Ակցիզային հարկի մասին» օրենքը համահունչ է, և մենք ընդհանրություն ունենք այդ օրենքի հետ կապված և ուզում ենք միանալուց առաջ նաև արձանագրել, որ կառավարությունն անգամ կոսմետիկ լուծումներ չիրականացրեց»,- նկատեց Մելքումյանը՝ հավելելով, թե իշխանությունն առաջ է ընթանում կարգախոսով՝ «ոչ թե քաղաքացիների համար, այլ քաղաքացիների հաշվին»:

Հիշեցնենք՝ «Ելք» դաշինքը երկու անգամ հանրահավաք-երթ է անցկացրել՝ ընդդեմ թակնացումների և հարկային բեռի ավելացման: Դաշինքը թեև հայտարարում էր, որ պայքարի խորհրդարանական լծակները սպառել են, և դա է պատճառը, որ անցել են փողոցային պայքարի, բայց ստացվում է, որ կրկին փողոցային պայքարից վերադառնում են խորհրդարան:

Նկատենք՝ եթե անգամ անհրաժեշտ ստորագրություններն ապահովվեն արտահերթ նիստ հրավիրելու համար միևնույն է նիստի անցկացման համար անհրաժեշտ քվորումն առանց իշխող հանրապետականի աջակցության հնարավոր չէ:

Շողիկ Գալստյան