Այգին բարեկարգելու համար անհրաժեշտ էր ծառահատում իրականացնե՞լ

Փետրվարի 3-ին՝ կենսգիշերին մոտ, Երևանի քաղաքապետարանի դիմաց գտնվող Մյասնիկյան արձանի հետնամասի այգում ծառահատում է իրականացվել: Factor.am-ի հետ զրույցում ականատեսները, որոնք չցանկացան տեսանկարահանվել, պատմեցին՝ տարածքում հատվել է մոտ 68 ծառ: Նրանց պատմելով ՝ հատվել են ինչպես հաստաբուն, այնպես էլ մոտ 4-5 տարի առաջ տնկած ծառեր՝ հիմնականում եղևնիներ և կաղնիներ:

Երևանի ավագանու ընդդիմադիր «Ելք» խմբակցության անդամ Արայիկ Հարությունյանին ծառերի սպասվող սպանդի մասին ահազանգել են կատարվածից դեռ օրեր առաջ:Հարությունյանը շտապել է այդ մասին հայտնել քաղաքապետարանի համապատասխան վարչությանը, սակայն, փաստորեն, անօգուտ:

Ըստ Երևանի ավագանու «Ելք» խմբակցության անդամի՝ այգում ծառահատման նախաձեռնությունը եղել է շինարարական աշխատանքներ իրականացնող  կապալառու՝ «Հայր և որդի Մանվելյաններ» ընկերությանը: Կատարվող շինաշխատանքները ֆինանսավորվում են «Վարդանյանների ընտանիք» բարեգործական հիմնադրամի կողմից: Վարդանյանների հիմնադրամը  այգին բարեկարգելու թույլտվությունը  քաղաքապետարանից ստացել է  դեռ նախորդ տարվա դեկտեմբերին: Ըստ նախագծի` Վարդանյանների ընտանիքը նախատեսում է բարեկարգել այգին, և Երևանի 2800-ամյակին ընդառաջ այն փոխանցել համայնքային սեփականության: 

Հարությունյանի պնդմամբ՝ ավագանու կողմից դեկտեմբեր ամսին Վարդանյանների ընտանիքին տրված՝ այգին բարեկարգելու թույլտվության մեջ ծառահատումների մասին որևէ խոսք չի եղել:

Երևանի քաղաքապետարանի աշխատակազմի բնապահպանության վարչության պետ Ավետ Մարտիրոսյանը՝ մեր հարցը լսելով հորդորեց ավելի ուշ զանգել, իսկ «ավելի ուշ» կատարված մեր բոլոր զանգերը մնացին անպատասխան:

Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության պետ Արթուր Գևորգյանն էլ, ինչպես ինքն ասաց, որոշ տեսանյութեր է տեսել համացանցնում, սակայն մեկնաբանություն ստանալու համար հորդորեց հարցերն ուղարկել գրավոր:

Պարզաբանում չհաջողվեց ստանալ նաև «Վարդանյանների ընտանիք» հիմնադրամից: Իսկ ահա Ոստիկանությունից հայտնեցին՝ ստացել են ահազանգ և այժմ ստուգումներ են իրականացվում:

Հ.Գ. Ավելի ուշ, քաղաքապետարանը հանդես եկավ պարզաբանմամբ՝ նշելով, որ այգում իրականացվող հիմնանորոգման աշխատանքների շրջանակում, մասնագիտական համապատասխան եզրակացությամբ, հատվել են չոր և ծերացած ծառեր: Նաև տրվեց հավաստիացում, որ այգին կհամալրվի քառապատիկ ավել քանակությամբ բարձրարժեք ծառերով: Իսկ թե որքանով են հատված ծառերը չոր և ծերացած՝ պարզ է երևում է տեսանյութում:

Շողիկ Գալստյան