01.11.2024 | 18:26
Թուրքիան ՌԴ-ից ներկրվող բնական գազի համար հատուկ գին է ցանկանում ստանալ
Որքա՞ն գումար է հավաքվել «Covid-19 Հայաստան» դրամահավաքի արդյունքում․ «Հայաստան» համահայկական հիմնադրամը պարզաբանում է
Հասարակություն
10.03.2021 | 18:37
«Covid-19 Հայաստան․ միասին հաղթահարենք համավարակը» դրամահավաքի վերաբերյալ ներկայացրած տվյալներում թվային անհամապատասխանություն կա։ Օրեր առաջ այս մասին ԱԺ-ում կորոնավիրուսի համավարակի դեմ պայքարի արդյունավետությունն ուսումնասիրող քննիչ հանձնաժողովի հերթական նիստին հայտարարեց հանձնաժողովի նախագահ, «Լուսավոր Հայաստան» խմբակցության պատգամավոր Արկադի Խաչատրյանը։
Ըստ Խաչատրյանի՝ դրամահավաքն իրականացվել է հիմնադրամի նախաձեռնությամբ անցյալ տարի մարտի 13-ից մինչև օգոստոսի 27-ը, որի ընթացքում հավաքագրվել է 325 միլիոն 608 հազար 555 դրամ, որից 154․8 միլիոնը՝ մասնավոր կազմակերպություններից, 18 միլիոն 115 հազար դրամը՝ արտերկրում և ՀՀ-ում բնակվող ֆիզիկական անձանցից, 152 միլիոն 675 հազար դրամը՝ Սփյուռքում գործող հիմնադրամի տեղական մարմիններից։
«Ուսումնասիրվել է հիմնադրամի կայքում տեղադրված հաշվետվությունը, որը, ըստ էության, փաստում է՝ հուլիսի 22-ի դրությամբ հավաքագրված է եղել 830 հազար դոլար, որից 695 հազար 244 դոլարն ուղղվել է տարբեր բժշկական պարագաների և սարքավորումների ձեռքբերմանը, շտապօգնության անձնակազմի ֆինանսական աջակցությանը, կարիքավոր ծերերին ամենամսյա սննդի մատակարարմանը։ Որոշակի հարց, լրացուցիչ պարզաբանման կարիք կա, որովհետև մինչև օգոստոսի 27-ը հավաքագրված է եղել 325 միլիոն դրամ, սակայն, ըստ կայքի հաշվետվության, 830 հազար դոլար արդեն իսկ հավաքագրված է եղել հուլիսի 22-ի դրությամբ, և թվային որոշակի անհամապատասխանություն կա, խնդրենք՝ հիմնադրամը հետագայում պարզաբանի սա»,- նշեց Խաչատրյանը։
Factor.am-ի հարցմանն ի պատասախան՝ «Հայաստան» համահայկական հիմնադրամից հայտնեցին, թե որն է նշված թվային անհամապատասխանության պատճառը։ Բանն այն է, որ ԱԺ հանձնաժողովին տրված տվյալներում նշվել են մուտք եղած զուտ դրամական միջոցները, իսկ կայքում հրապարակված տվյալներում ներառված են նաև սփյուռքում հավաքագրված գումարներով գնված և Հայաստան ուղարկված անհրաժեշտ իրերի արժեքները։
«Կորոնավիրուսի դեմ պայքարում «COVID-19 Հայաստան. միասին հաղթահարենք համաճարակը» դրամահավաքի շրջանակում հավաքագրվել է ավելի քան 800.000 դոլար գումար, ավելի ստույգ դրամով՝ 389.838.949,26 դրամ, որից զուտ դրամական միջոցներով մուտք է եղել «Հայաստան» հիմնադրամ և ծախսվել 325.608.555,73 դրամը: Մնացած գումարներով, որոնք չեն երևում ԱԺ ֆինանսական հաշվետվության մեջ, սփյուռքում հավաքագրվելուց հետո նվիրատուների միջոցով ձեռք են բերվել անհրաժեշտ բուժական միջոցներ, սարքավորումներ և ուղարկվել Հայաստանի բուժհաստատություններ: Հաշվետվությունում չի երևում նաև կորոնավիրուսի համավարակով պայմանավորված փակ սահմանների պատճառով ՌԴ-ում մնացած հայրենակիցներին Հայաստան տեղափոխելու ծախսը, որի վճարումը կատարվել է հիմնադրամի կողմից»,- նշված է «Հայաստան» համահայկական հիմնադրամի պատասխանում։
Հիշեցնենք՝ խորհրդարանական քննիչ հանձնաժողովն ուսումնասիրում է համավարակի տարածումը կանխելու, այդ վիրուսի դեմ պայքարի՝ համաճարակի հետևանքները մեղմելու կամ վերացնելու ուղղությամբ կառավարության և պարետատան իրականացրած միջոցառումների արդյունավետությունը, ինչպես նաև արտակարգ դրության ժամանակահատվածում մարդու իրավունքների և հիմնարար ազատությունների սահմանափակումների արդյունավետությունն ու իրավաչափությունը։
Անժելա Պողոսյան
