17.09.2026 | 16:50
Ադրբեջանի ցամաքային սահմանները փակ կմնան մինչև 2027 թվականի հունվարի 2-ը․ COVID-19-ի կարանտինային ռեժիմը կրկին երկարացվել է
«Թումո» տուփեր կստեղծվեն Սևան քաղաքում և Գեղարքունիքի մարզի մի շարք այլ համայնքներում
Հասարակություն
06.03.2021 | 11:44
Գեղարքունիքի մարզպետ Գնել Սանոսյանը տեղեկացնում է, որ երեկ ընդունել է «Թումո» ստեղծարար տեղեկատվական կենտրոնի տնօրեն Մարի Լու Փափազյանին և կենտրոնի ներկայացուցիչներին։
«Հանդիպման ընթացքում հյուրերը ներկայացրեցին «Թումո» ստեղծարար տեղեկատվական կենտրոնի ընդլայնման ծրագիրը։
Հանդիպման հիմնական նպատակը «Թումո» կենտրոնի և 10-ից ավելի տուփերի տեղորոշման խնդրի կարգավորումն է: Տուփեր են նախատեսել բացել մարզի այն համայնքներում, որոնք իրենց աշխարհագրական դիրքով հասանելի կլինեն հարակից համայնքների դպրոցականների համար: Ակնկալում են փոխհամագործակցություն մի շարք այլ ուղղություններում։
Հավանություն տվեցի ներկայացված ծրագրի այն բաղադրիչին, որով նախատեսվում է «Թումո» կենտրոն և տուփեր տեղադրել` ելնելով բնակչության, սովորող աշակերտների և ուսանողների թվաքանակից, ճանապարհային հաղորդակցության հնարավորություններից և նպաստավոր այլ գործոններից։
Ուրախ եմ, որ ամիսներ առաջ կայացած մեր հանդիպումները, քննարկումներն ու համատեղ աշխատանքն արդեն տվել են իրենց դրական արդյունքները: Ես կարևորում եմ այն համայնքների ընտրությունը, որտեղ ուսուցումը հասանելի լինի նաև սահմանամերձ համայնքների դպրոցականների համար։
Կփորձենք նաև «Թումո» կենտրոնի և տուփերի ստեղծման որոշակի հարցերում ներգրավել բարերարներին։ Գեղարքունիքի մարզպետարանը և մարզի համայնքները պատրաստակամ են աջակցել ծրագրին, որպեսզի մարզի մնացած տուփերը ևս սեղմ ժամկետներում կառուցվեն ու կյանքի կոչվեն։
Ըստ Մարի Լու Փափազյանի՝ փոխհամաձայնությամբ ընտրված համայնքներից յուրաքանչյուրում, կախված սովորողների թվաքանակից, կտեղադրվի 2-3 «Թումո» տուփ։ Կենտրոնը և տուփերն ապահովվելու են ժամանակակից տեխնիկական միջոցներով և դասավանդող մասնագետ կադրերով:
Մարտի 5-ի դրությամբ Գեղարքունիքի մարզում գործում է Գավառի «Թումո» ստեղծարար կենտրոնի տուփը, ընթացքի մեջ է հերթական տուփի բացումը Սևան քաղաքում»,- ֆեյսբուքի իր էջում գրել է մարզպետը:
