Պարո՛ն Վարդազարյան,Դուք անարգել եք ԱԺ-ն. Հովակիմյանը՝ ինքնաբացարկ հայտնած թեկնածուի և Ջհանգիրյանի մասին. ՏԵՍԱՆՅՈՒԹ

Ազգային ժողովում շարունակվում է նիստը, որի օրակարգում Վճռաբեկ դատարանի դատավորի ընտրության հարցի քննարկումն է:

«Սամվել Գրիգորյանի հետ կապվածը ոչ թե օրենսդրական բաց է, այլ թեկնածուի անպատասխանատվության արդյունք է, որ նա չի ներկայացել, և դուք ոչ թե կանխել եք, այլ խրախուսել եք այդ անպատասխանատվությունը: Թեկնածուն պետք է կա՛մ այդ ամբիոնից ինքնաբացարկ ներկայացներ, կա՛մ ԱԺ նախագահին ուղղված գրությամբ: Դուք ձեր այդ քայլով անարգել եք Ազգային ժողովը»,- դիմելով ԲԴԽ նախագահ Ռուբեն Վարդազարյանին, ասաց «Իմ քայլի» պատգամավոր Վահագն Հովակիմյանը: Նա նաև հավելեց, որ այդ մասին է վկայում նաև ԲԴԽ անդամ դարձած Գագիկ Ջհանգիրյանի նկատմամբ լրագրողների հետ զրույցում անվստահության հարցի բարձրացումը:

Պատգամավորն անդրադարձավ նաև ԲԴԽ նախագահի հայտարարությանը հաջորդած դատական վճիռներին և հարցրեց. «Դուք այդ ամենի համար ձեզ պատասխանատու համարո՞ւմ եք, թե՞ ոչ»:

ԲԴԽ նախագահը պատասխանեց, որ պատգամավորի կատարած հարցադրումների ենթատեքստում ինքը պատասխանատու չէ:

Վահագն Հովակիմանը Ռուբեն Վարդազարյանից հետաքրքրվեց՝ եթե ապացույցներ ի հայտ գան, որ կոնկրետ գործով Վարդազարյանը միջամտել է՝ պատրա՞ստ է անմիջապես հրաժարական ներկայացնել:

Ի պատասխան՝ ԲԴԽ նախագահն ընդգծեց. «Եթե ապացույց լինի, որ ինչ-որ մի կոնկրետ գործով ես միջամտել եմ, այդտեղ ոչ միայն հրաժարականի, այլև քրեական պատասխանատվության հարց առաջ կգա»:

Մանրամասները՝ տեսանյութում: