«Հանրապետականները վախենում են». Փաշինյանի և Գեղամյանի ձեռնամարտի հարցով ժամանակավոր հանձնաժողով չի ստեղծվի

Հիշեցնենք՝ ԱԺ «Ելք» խմբակցության ղեկավար Նիկոլ Փաշինյանը հայտարարել էր, որ ՀՀԿ խմբակցության պատգամավոր Արտաշես Գեղամյանը 2017 հոկտեմբերի 5-ին ԱԺ միջանցքում բռունցքներով հարձակվել է իր վրա։ «Հայաստանի Հանրապետության 6-րդ գումարման ԱԺ ՀՀԿ խմբակցության պատգամավոր Արտաշես Գեղամյանի կողմից 2017թ. հոկտեմբերի 5-ին պատգամավորական էթիկայի կանոնները խախտելու վերաբերյալ Ազգային ժողով եզրակացություն ներկայացնելու համար ԱԺ էթիկայի ժամանակավոր հանձնաժողով ստեղծելու մասին» «Ելք»-ի ներկայացրած նախագծում ասվում էր, որ օրենսդիր մարմնի ներկայացուցչի՝ Արտաշես Գեղամյանի կողմից նման վարքագծի դրսևորումը անհամատեղելի է բարձրաստիճան պաշտոնատար անձի վարքագծի նորմերի հետ, քանի որ Ազգային ժողովի պատգամավորը պետք է հարգալից վերաբերմունք ցուցաբերի հանրության նկատմամբ, պարկեշտ և օրինակելի լինի՝ ոչ միայն պատգամավորական լիազորությունները իրականացնելիս, այլ նաև ամենօրյա կյանքում:

Հիմնական զեկուցող, պատգամավոր Արտակ Զեյնալյանը նշեց՝ նախագիծն ունի իրավական մի շարք հիմքեր՝ հղում անելով թե՛ Սահմանադրության, թե՛ «ԱԺ կանոնակարգ» օրենքի որոշ հոդվածներին: «Փաստական հիմք է «Ելք» խմբակցության ղեկավար, պատգամավոր Նիկոլ Փաշինյանի հայտարարությունը, որ ՀՀԿ խմբակցության պատգամավոր Արտաշես Գեղամյանն Ազգային ժողովի միջանցքում բռունցքներով հարձակվել է իր վրա»,- ասաց Արտակ Զեյնալյանը՝ նկատելով, որ այդ երկու հիմքերով էլ առաջարկել են որոշման նախագիծ՝ ըստ որի պետք է ստեղծվեի ԱԺ ժամանակավոր հանձնաժողով՝ պատգամավոր Արտաշես Գեղամյանի կողմից պատգամավորական էթիկայի կանոնները խախտելու վերաբերյալ Ազգային ժողով եզրակացություն ներկայացնելու համար:

Հանձնաժողովի նախագահ Հրայր Թովմասյանը վերապահումներ հայտնեց նախ նախագծի անվանման հետ կապված՝ խնդրելով պարզաբանել՝ ի վերջո բռունցքներով հարձակվե՞լ է, թե՞ հարվածներ եղել են: Արտակ Զեյնալյանը նկատեց՝ հանձնաժողովը, եթե ստեղծվի, հենց դա էլ կպարզի:

Գործընկերոջ հարցը շարունակեց մեկ այլ հանրապետական՝ Գևորգ Կոստանյանը, նրան միացավ նաև հարցի հարակից զեկուցող Ռոստամ Մախմուդյանը՝ շեշտելով, որ նախագծի անվանման մեջ անձի անունը նշելով, խախտվում է անմեղության կանխավարկածը:

Քննարկումը վերածվեց վիճաբանության, ընդդիմադիր «Ելք» խմբակցության մեկ այլ պատգամավոր Էդմոն Մարուքյանը հայտարարեց՝ եթե ժամանակավոր հանձնաժողով չստեղծվի, ուրեմն «հանրապետականները վախենում են»:

«Էդ ո՞նց է լինում, որ միշտ ընդդիմադիրների վրա են հարձակվում, իսկ դա շարունակվում է, որովհետև մնում է անպատիժ։ Եթե հանձնաժողովը չստեղծվի, կնշանակի Հանրապետականը վախենում է», – ասաց Մարուքյանը՝ հետաքրքրվելով՝ ինչո՞ւ են ՀՀԿ-ականները վախենում հանձնաժողով ստեղծել հատկապես, եթե մեծամասնություն են լինելու այդ հանձնաժողովի կազմում:

«Էստեղ հանրապետական վախեցած դեմք եք տեսե՞լ: Բացի այդ, էթիկայի հանձնաժողովը պատժող հանձնաժողով չի, այն ընդամենը եզրակացություն է տալիս եղե՞լ է խախտում, թե՞ ոչ»,- հակադարձեց հանձնաժողովի նախագահ Հրայր Թովմասյանը:

Նախագիծը դրվեց քվեարկության, որին կողմ քվեարկեց միայն Էդմոն Մարուքյանը։