27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Թուրք-ղազախական ռազմական համագործակցություն․ Ղազախստանը կփորձարկի թուրքական զինատեսակներ
Քաղաքականություն
02.03.2021 | 14:36
Ղազախստանի պաշտպանության նախարարությունը հայտարարել է, որ փորձարկելու է Թուրքիայից ներկրված զրահափոխադրիչները և հեռակառավարվող սպառազինության համակարգերը։ Այս մասին հայտնում է թուրքական Անադոլու գործակալությունը՝ հղում կատարելով Ղազախստանի ՊՆ-ին։
Ղազախստանի կողմից փորձարկված զրահափոխադրիչները հայտնի են Arma 8 x 8 անվամբ և մշակվել են թուրքական Otokar ընկերության կողմից։ Զրահամեքենան փորձարկվել է նաև Nefer հեռակառավարվող պտուտահաստոցով, որը որպես համալրում տրամադրվել է ղազախական կողմին՝ հաշվի առնելով երկրում ձմեռային պայմանները։
Համաձայն թուրքական գործակալության՝ Otokar ընկերությունը Ղազախստանին զրահափոխադրիչներն հատկացրել է անվճար՝ փորձարկումների համար։ Ըստ լրատվական գործակալության՝ Ղազախստանի կողմից թուրքական սպառազինության նկատմամբ հետաքրքրության աճ է նկատում։
Նշվում է, որ փետրվարի 5-ին, թուրք և ղազախ պաշտոնյաների միջև կայացած հանդիպման ընթացքում մի շարք պայմանագրեր են կնքվել՝ այդ թվում պաշտպանական ոլորտին առնչվող:
Որոշ վերլուծաբաններ թուրք-ղազախական համագործակցությունը համարում են Կենտրոնական Ասիայում պատմականորեն գերիշխող տերություն համարվող Ռուսաստանի ազդեցությունը մեղմելու միջոց։
Հիշեցնենք, որ Ղազախստանը հանդիսանում է ՀԱՊԿ անդամ երկիր՝ Հայաստանի,Ղրղզստանի, Ռուսաստանի, Տաջիկստանի և Ուզբեկստանի հետ միասին։
Տաթև Ֆռանգյան
