Ընդդիմությունը հոգեվարքի մեջ է, նույնիսկ Սաշիկ Սարգսյանն է հանրահավաքի գնում․ Նարեկ Գրիգորյան. ՏԵՍԱՆՅՈՒԹ

Ընդդիմությունը շարունակում է հանրահավաքները՝ պահանջելով վարչապետ Նիկոլ Փաշինյանի հրաժարականը և շեշտելով, որ կոտրելու է Փաշինյանի բոլոր հենարանները: Factor.am-ի հետ զրույցում անդրադառնալով այս դիտարկմանը՝ «Իմ քայլը» խմբակցության պատգամավոր Նարեկ Գրիգորյանը նշեց. «Նրանք ընդդիմություն չեն, նախկին իշխանություն են: Խոսում են վարչապետի հենարանը կոտրելու մասին, իսկ վարչապետի հենարանը ՀՀ քաղաքացին է, ՀՀ ժողովուրդն է: Նախկինում ժողովուրդը պայքարում էր քրեաօլիգարխիայի դեմ, հիմա քրեաօլիգարխիան է պայքարում ժողովրդի դեմ: Չի կարող այնպես լինել, որ քրեաօլիգարխիան, պայքարելով ժողովրդի դեմ, հաղթանակ տանի: Իշխանությունը պատկանում է ժողովրդին, և ժողովուրդն իր իշխանությունը պահում է ամուր»:

Պատգամավորը պնդեց, որ արտահերթ ընտրությունների հանրային պահանջ չկա: «Մենք առաջարկեցինք, ընդդիմությունը չհամաձայնեց գնալ արտահերթ ընտրությունների:

Հիմա ընդդիմությունը հոգեվարքի մեջ է: Նույնիսկ Սաշիկ Սարգսյանն է գնում հանրահավաքի: Այսինքն՝ ի՞նչ, ժողովուրդը Սաշիկ Սարգսյանին է իշխանություն տալո՞ւ: Եթե տալու է, թող ժողովուրդը դուրս գա փողոց, ասի՝ ուզում ենք դուք գնաք, թող սաշիկսարգսյանները գան… Հանրահավաքներին նախկին իշխանության այլ ներկայացուցիչներ էլ են մասնակցում և նույնիսկ խոսում են կոռուպցիայից: Չեմ կարծում, թե ՀՀ քաղաքացին նրանց սատարելու է»,- նշեց Գրիգորյանը՝ հավելելով, որ նրանք տեսլական չունեն և այս ամիսների ընթացքում որևէ ծրագիր չեն ներկայացրել հանրությանը:

Մանրամասները՝ տեսանյութում: