Քաղաքականություն
23.02.2021 | 17:03
ԱՄՆ-ում հնգօրյա սուգ է հայտարարվել՝ ի հիշատակ կորոնավիրուսային համաճարակի զոհերի։ Երկրի նախագահ Ջո Բայդենը հրամայել է իջեցնել բոլոր պետական դրոշները։
Ամերիկացիներին ուղղված իր ուղերձի խոսքը բացելիս վերջինս նշել է, որ Covid-ից մահացած ամերիկացիների թիվն ավելի շատ է, քան Առաջին Համաշխարհային պատերազմի, Երկրորդ Համաշխարհային պատերազմի ու Վիետնամի պատերազմի զոհերի թիվը։ «Սոսկալի է, 500,071 մահվան դեպք»,- ասել է նա։ Այս ցուցանիշն ամենաբարձրն է աշխարհի բոլոր երկրների համեմատ, գրում է BBC news-ը։
«Որպես ազգ, մենք չենք կարող համակերպվել այդպիսի դաժան ճակատագրի հետ: Մենք պետք է դիմագրավենք տխրության զգացողությանը», – ասել է նա:
Այնուհետև ԱՄՆ նախագահն ու փոխնախագահը Սպիտակ տան մոտ մոմավառության արարողության ժամանակ մեկ րոպե լռությամբ հարգել են զոհերի հիշատակը:
ԱՄՆ-ում այժմ Covid-19-ի հաստատված դեպքերի թիվը հասել է 28,1 միլիոնի, ինչը նույնպես համաշխարհային ռեկորդ է: «Այսօր ես խնդրում եմ բոլոր ամերիկացիներին հիշել: Հիշենք նրանց, ում կորցրեցինք և հիշենք նրանց, ովքեր լքեցին մեզ», – ասել է նախագահ Բայդենը `կոչ անելով ամերիկացիներին միասին պայքարել Covid-ի դեմ:
Տաթև Ֆռանգյան
