Ռադիոտուն մտնելը շենքեր գրավելու հետ համեմատելն անտեղի եմ համարում. Ալեն Սիմոնյան. ՏԵՍԱՆՅՈՒԹ

Ընդդիմության կողմից թե՛ գործողություններով, թե՛ հնչած բռնության կոչերով մենք շատ ծայրահեղ վիճակում ենք: Այս մասին լրագրողների հետ ճեպազրույցում հայտարարեց ԱԺ փոխնախագահ Ալեն Սիմոնյանը՝ մեկնաբանելով ԱԺ «Իմ քայլը» խմբակցության պատգամավոր Անդրանիկ Քոչարյանի հայտարարությունը, թե «պետությունը կրակելու մոնոպոլ իրավունք ունի»:

«Ամեն հանրահավաքի ժամանակ բռնության, ապստամբության, շենքեր գրավելու կոչեր, պատգամավորներին, ոստիկաններին օր ու արև չտալու կոչեր են հնչում: Այս ամեն ինչի հիմքը նախևառաջ լուսաբանեք: Ինչ վերաբերում է պարոն Քոչարյանի ասածին, ես կարծում եմ, որ, օրինակ՝ նոյեմբերի 9-ի լույս 10-ի գիշերվա գործողությունները, որ ուղղորդվում էին ընդդիմության տարբեր թևերի կողմից, կարող էին ավելի կոշտ արձագանք ստանալ, և ԱԺ նախագահի կյանքին վտանգ չսպառնար, Կառավարության շենքում աշխատակիցների նկատմամբ բռնություն տեղի չունենար, չգիտես թե ինչու որևէ մեկը չի խոսում առկա բռնության մասին»,- նշեց Սիմոնյանը՝ հավելելով, որ ՀՀ իշխանությունը պետք է գործի օրենքի սահմաններում, ինչպես եղել է հեղափոխությունից հետո:

Ալեն Սիմոնյանն ընդգծեց, որ ռադիոտուն մտնելը շենքեր գրավելու հետ համեմատելն անտեղի է համարում. «Հեղափոխության ժամանակմեր բոլոր գործողությունները եղել են խաղաղ, բռնության որևիցե կոչ չի եղել»:

Մեկնաբանելով «Հայրենիքի փրկության շարժման» վարչապետի թեկնածու Վազգեն Մանուկյանի վերջին հայտարարությունները, որ եթե ընդդիմության դեմ իշխանություններն իրենց «պլանկան բարձրացնեն», ընդդիմությունն էլ նույնը կանի՝ Ալեն Սիմոնյանը նշեց. «Վազգեն Մանուկյանը հին աճպարար է: Իշխանությունը որևէ պլանկա բարձրացնելու խնդիր չունի: Իշխանությունն իշխանություն է, որտեղ կան ոստիկանություն, ԱԱԾ, ներքին զորքեր և այլն: Այսինքն՝ մենք իրանց հետ ինչպե՞ս պետք է պլանկա բարձրացնենք: Մե՞նք էլ պետք է դուրս գանք հրապարակներ, բռնության կոչեր ու անպատասխանատու հայտարարություններ անենք: Կարծում եմ՝ Վազգեն Մանուկյանը իր քաղաքական կարիերան ևս մեկ անգամ ավարտել է, ուղղակի իրեն չեն ասում, որ իր տրամադրությունը չփչանա»:

Ալեն Սիմոնյանը նաև հավելեց, որ Վազգեն Մանուկյանն ու իրեն սատարողները գտնվում են ցայտնոտի մեջ: «Ակնհայտ է դարձել, որ Վազգեն Մանուկյանը բալաստ է ընդդիմադիր ուժերի համար, և նրանք փորձում են ամեն կերպ տարանջատվել: Նրանք իրարամերժ հայտարարություններ են անում և իրենց վրա չեն վերցնում Մանուկյանի ասածների պատասխանատվությունը»,- ասաց Սիմոնյանը՝ հիշեցնելով նաև 1996 թ. դեպքերը, երբ Վազգեն Մանուկյանի կողմնակիցները գրավել էին ԱԺ շենքը և ծեծի ենթարկել ԱԺ նախագահին ու փոխնախագահին:

Մանրամասները՝ տեսանյութում: