Մենք կպայքարենք մինչև վերջին կաթիլ արյունը․ Վրաստանում ձերբակալել են ընդդիմադիր Նիկա Մելիային

Վրաստանի խոշոր ընդդիմադիր «Միասնական ազգային շարժում» կուսակցության ղեկավար Նիկա Մելիային ձեռրբակալել են այսօր իրականացված հատուկ օպերացիայի արդյունքում։ Այս մասին հայտնում է Sputnik-Georgia-ն։
Լրատվականը տեղեկացնում է, որ կուսակցության գրասենյակի շենքն ամբողջությամբ լցված է եղել հատուկ նշանակության ուժերով։ Շենքի մոտ են հավաքվում ընդդիմադրի կողմնակիցները, իրավիճակը լարված է։

«Մենք շարունակում ենք պայքարը»,- ասել է Խաթիա Դեկանոիձեն՝ հայտարարելով, որ իշխանությունները գրոհի ժամանակ օգտագործել են արցունքաբեր գազ, ինչն արգելված է անել փոքր սենյակներում։

«Ձերբակալությամբ պայքարը չի ավարտվի, այլ միայն կսկսվի։ Ինչ էլ մեզ անեն, մենք կպայքարենք մինչև վերջին կաթիլ արյունը․․․ Շնորհակալություն Աստծուն, որ բոլորը փրկվեցին»,- ասել է «Եվրոպական Վրաստան» կուսակցության ղեկավար Գիգի Ուգուլավան։

Նախնական տվյալների համաձայն՝ Մելիային արդեն տարել են կուսակցության գրասենյակից։

Շտապօգնության բժիշկները օգնություն են ցուցաբերում ընդդիմադրի ձերբակալության համար իրականացված հատուկ օպերացիայի արդյունքում տուժածներին։

Հիշեցնենք՝ Վրաստանի ընդդիմությունը մինչ օրս բողոքի ցույցեր է անցկացնում նախորդ տարվա հոկտեմբերին տեղի ունեցած խորհրդարանական ընտրությունների արդյունքների դեմ։ Հոկտեմբերի 31-ին կայացած ընտրությունների արդյունքով իշխող «Վրացական երազանք» կուսակցությունը, հավաքելով ձայների 48,22%-ը, ստացել է երկրի օրենսդիր մարմնի 150 տեղերից 90-ը: Ընդդիմադիր կուսակցություններից ամենամեծ հաջողությունը գրանցել է Վրաստանի նախկին նախագահ Միխեիլ Սաակաշվիլիի «ՄԱՇ» կուսակցությունը, որի օգտին է քվեարկել ընտրողների 27,18%-ը, ստանալով 36 աթոռ խորհրդարանում: Ավելի վաղ Վրաստանի կառավարության ղեկավար Գեորգի Գախարիան հրաժարական էր ներկայացրել: Նա հայտարարել էր, որ հեռանալու պատճառը իշխող կուսակցությունում տարաձայնություններն էին ՝ կապված ամենամեծ ընդդիմադիր կուսակցության նախագահ Նիկանոր (Նիկա) Մելիայի ձերբակալման հետ:

Տաթև Ֆռանգյան