Թուրքիան շարունակում է Ադրբեջանին «Բայրաքթարներ» մատակարարել՝ չնայած անօդաչուների որոշ մասերի էմբարգոյին

Թուրքիան շարունակում է «Բայրաքթար» անօդաչու թռչող սարքեր մատակարարել Ադրբեջանին։ Այս մասին հայտարարել է «Բայքար» ընկերության տեխնիկական հարցերով տնօրեն, Թուրքիայի նախագահ Էրդողանի փեսա Սելջուկ Բայրաքթարը։ Նա նշել է, որ այսօր արտադրում են այնպիսի անօդաչու սարքեր, որոնք բավարարում են ինչպես Թուրքիայի, այնպես էլ նրա բարեկամ ու դաշնակից երկրների կարիքները։

Բայրաքթարը նաև հավելել է, որ չնայած Թուրքիայի դեմ տեխնոլոգիական էմբարգոյին՝ անօդաչուները ներկայում 93 տոկոսով արտադրվում են՝ տեղական արդյունաբերության հնարավորություններն օգտագործելով։ Նա նշել է, որ անօդաչուների արժեքի հիմնական մասը կազմում է ծրագրային ապահովումն ու կառավարման համակարգը, ինչը թուրք ինժեներների ու ծրագրավորողների արտադրանքն է։

«Քանի որ անհրաժեշտ մասերի 93 տոկոսն արտադրվում է տեղական հնարավորությունների հաշվին, այսօր մենք առանց դժվարությունների Bayraktar TB2-ն արտահանում ենք Ադրբեջան, Կատար, Ուկրաինա, որն արտադրում է աշխարհում ամենամեծ «Անտոնով» տիպի ինքնաթիռները։ Մենք արտահանման բանակցություններ ենք վարում շատ երկրների հետ»,- ասել է Սելջուկ Բայրաքթարը։

Հիշեցնենք, որ Արցախյան պատերազմում, երբ Թուրքիան սկսեց բացահայտ ռազմական աջակցություն ցուցաբերել Ադրբեջանին, մի շարք երկրներ դադարեցրին Անկարային «Բայրաքթար» անօդաչուների մասեր մատակարարել, ինչի պատճառով էլ վերջերս Էրդողանը քննադատել էր ՆԱՏՕ-ի դաշնակիցներին ու նրանց անվանել «վատ հարևաններ»։

«Մենք միասին ենք ՆԱՏՕ-ում։ Մենք տեսախցիկներ ենք ուզում, բայց նրանք չեն տալիս։ Մեզ ասում են՝ «ինչո՞ւ եք կռվում Հայաստանում»։ Հայաստանը հարձակվել է իմ դաշնակցի վրա, մենք պետք է մեր բոլոր հնարավոր աջակցությունը ցույց տանք։ Արդյո՞ք մենք ՆԱՏՕ-ում միասին չենք»,- հարցադրում էր հնչեցրել Էրդողանը։

Նշենք նաև, որ թուրքական Bayraktar TB2 անօդաչուն ռեկորդ է սահմանել՝ հաջողությամբ ավարտել 300․000 ժամանոց թռիչքը։ Այս մասին տեղեկությունը տարածել է «Բայքար» ընկերությունը։ Հաղորդագրության մեջ նաև նշվում է, որ ներկայում Թուրքիայի, Ուկրաինայի, Կատարի ու Ադրբեջանի ԶՈՒ-ում 160 «Bayraktar TB2» կա։ Ի դեպ, «Բայրաքթարները» Թուրքիայի ԶՈՒ-ում են 2014 թվականից։

Էմմա Չոբանյան