ԲԴԽ-ն այսօր կքննարկի Գագիկ Ջհանգիրյանի լիազորությունները դադարեցնելու վերաբերյալ դատավորի դիմումը

Բարձրագույն դատական խորհուրդն այսօր քննարկելու է Գագիկ Ջհանգիրյանի` ԲԴԽ անդամի լիազորությունները դադարեցնելու վերաբերյալ դատավոր Կարինե Պետրոսյանի դիմումը։
Factor.am-ի հետ զրույցում ԲԴԽ մամուլի և հասարակայնության հետ կապերի ծառայության պետ Արման Խաչատրյանը ասաց ․

«Բարձրագույն դատական խորհրդի նախագահի առաջարկով, այսօր, Խորհուրդում, հերթական նիստից հետո կքննարկի Երևան քաղաքի ընդհանուր իրավասության դատարանի դատավոր Կարինե Պետրոսյանի դիմումն ուղղված Խորհրդի նախագահին»:

Այսինքն ԲԴԽ-ն փակ նիստում կորոշի՝ արդյոք ունի լիազորություն դիմումին ընթացք տալու և սույն հարցով որոշում կայացնելու։

Նշենք, որ դատավորը ավելի վաղ ԲԴԽ նախագահին ուղղված դիմումի հիմքում նշել է ԲԴԽ իրավաբան-գիտնական անդամ Գագիկ Ջհանգիրյանի՝ 65 տարին լրացած լինելու հանգամանքը․ ««Հայաստանի Հանրապետության դատական օրենսգիրք» Հայաստանի Հանրապետության սահմանադրական օրենքի 160-րդ հոդվածի 5-րդ կետի կարգով անհապաղ հայտարարություն տարածել դատական իշխանության պաշտոնական կայքում՝ Հայաստանի Հանրապետության դատական օրենսգիրք Հայաստանի Հանրապետության սահմանադրական օրենքի 160-րդ հոդվածի 1-ին մասի 2-րդ կետի հիմքով Գագիկ Ջհանգիրյանի լիազորությունները դադարելու վերաբերյալ»,- նշել էր դատավորը։

Ջհանգիրյանն ավելի վաղ անդրադարձել էր հարցին՝ պարզաբանելով, որ օրենքի այդ արգելքը միայն իրավաբան-անդամների վրա է տարածվում, գիտնական-անդամների համար սահմանափակում օրենքը չի նախատեսում: