14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
ՀՀ-ում ռուսական ռազմաբազայի մի մասը կարող է տեղափոխվել երկրի արևելք․ Վաղարշակ Հարությունյան
Քաղաքականություն
22.02.2021 | 12:26
ՀՀ պաշտպանության նախարար Վաղարշակ Հարությունյանը հայտարարել է, որ Երևանն ու Մոսկվան քննարկում են ռուսական 102-րդ ռազմաբազայի որոշակի զորամիավորման՝ Հայաստանի արևելք վերատեղաբաշխման հնարավորության հարցը։ Այս մասին նա ասել է «ՌԻԱ Նովոստիին» տված հարցազրույցում։
«Ավելի ճիշտ է խոսել ռուսական ռազմաբազայից որևէ ռազմական կազմավորում վերաբաշխելու հնարավորության մասին (հաշվի առնելով դրա ընդլայնումը) Հայաստանի արևելյան ուղղությամբ։ Այդ համատեքստում հարցի համատեղ մշակում է տարվում»,- նշել է ՀՀ պաշտպանության նախարարը։
Նա նաև հայտարարել է, որ հայկական կողմը շահագրգռված է Գյումրիում ռուսական 102-րդ ռազմաբազայի ներուժի ընդլայնման ու մեծացման հարցում։
«Հայաստանի Հանրապետության տարածքում ռուսական ռազմաբազայի ընդլայնումն ու ամրապնդումը միշտ եղել է օրակարգում, և հայկական կողմը մշտապես շահագրգռված է եղել՝ արդեն այն պարզ պատճառով, որ ռազմաբազան ամբողջական կազմով մտնում է Հայաստանի ու Ռուսաստանի զինված ուժերի միացյալ խմբավորման մեջ։ Հետևաբար, բազայի հնարավորությունների ընդլայնումն ինքնաբերաբար ավելացնում է համատեղ խմբավորման ներուժը, որը գործում է հավաքական անվտանգության Կովկասի տարածաշրջանում»,- ասել է նախարարը։
Ըստ նրա՝ «ՌԴ ՊՆ ղեկավարությունը, իհարկե, հաշվի է առել տարածաշրջանում առկա ռազմաքաղաքական իրողություններն ու ճիշտ քայլեր են արվել ռազմաբազայի ամրապնդման ու վերազինման ճանապարհին»։
«Եվ ես վստահ եմ, որ այս գործընթացը երկարաժամկետ բնույթ կկրի»,- ասել է Հարությունյանը։
Տաթև Ֆռանգյան
