Մյունխենյան համաժողով․ այս տարի՝ առցանց և առանց ՌԴ-ի ու ՉԺՀ-ի

Մյունխենյան համաժողովը շարունակում է մնալ աշխարհում խոշորագույն հարթակը, որի ժամանակ քննարկվում են համախարհային անվտանգության հարցեր։ 1963 թվականի փետրվարից ֆորումն ամեն տարի Գերմանիայում է հավաքում համաշխարհային էլիտայի ներկայացուցիչներին։ Սակայն այս տարի համաճարակի պատճառով միջոցառումը տեղի կունենա առցանց ձևաչափով։ Այս տարի դրան մասնակցում են ԱՄՆ նախագահ Ջո Բայդենն ու եվրոպացի առաջնորդները, այդ թվում՝ Գերմանիայի կանցլեր Անգել Մերկելն ու Ֆրանսիայի նախագահ Էմանուել Մակրոնը, գրում է DW-ի ռուսական ծառայությունը։

Վիրտուալ համաժողովը, որը տեղի է ունենում Ջո Բայդենի երդմնակալությունից ընդամենը մեկ ամիս անց, պետք է սկիզբ դնի ԱՄՆ-ԵՄ կապերի վերակառուցմանը, որոնք խիստ խաթարվել էին Դոնալդ Թրամփի նախագահության օրոք: Միացյալ Նահանգների նախկին նախագահը և նրա վարչակազմը բազմիցս քննադատել են ՆԱՏՕ-ին, եվրոպական դաշնակիցներին սպառնացել պատժամիջոցներով և արտահանման ավելի բարձր հարկերով, ինչպես նաև դուրս են եկել մի շարք միջազգային պայմանագրերից:

Մյունխենի համաժողովի նախագահ, ԱՄՆ-ում և Մեծ Բրիտանիայում Գերմանիայի նախկին դեսպան Վոլֆգանգ Իշինգերը DW-ին ասել է, որ անհամբերությամբ սպասում է անձնական հանդիպումներ ունենալու հնարավորությանը։

«Եթե անվտանգության համաժողովն անցկացվեր ավանդական ձևաչափով, ապա ԱՄՆ նախագահին կուղեկցեին նրա վարչակազմի տասնյակ աշխատակիցներ: Մենք նրանց հետ կարող էինք քննարկել մեր խնդիրները և հետաքրքրությունները», – շեշտել է Իշինգերը:

Համաժողովի ավանդական ձևաչափի դեպքում ենթադրվում էր մասնակիցների ավելի մեծ թիվ։ Կարևոր է նշել, որ Ռուսաստանի, Չինաստանի ու Մերձավոր Արևելքի երկրների ներկայացուցիչներն այս տարի չեն մասնակցում համաժողովին։ Այս անգամ այն զուտ ամերիկա-եվրոպական միջոցառում է լինելու։

Տաթև Ֆռանգյան