17.09.2026 | 15:48
Ուկրաինան և ՌԴ-ն զոհվածների մարմինների հերթական փոխանակումն են իրականացրել
Բռնաբարության դեպք Ավստրալիայի խորհրդարանում․ երկրի վարչապետը ներողություն է խնդրել ու խոստացել հետաքննություն իրականացնել
Քաղաքականություն
16.02.2021 | 12:24
Ավստրալիայի վարչապետ Սքոթ Մորիսոնը ներողություն է խնդրել մի կնոջից, որը պնդել է, որ իր գործընկերներից մեկն իրեն բռնաբարել է երկրի խորհրդարանում, և խոստացել է մանրակրկիտ հետաքննություն իրականացնել, գրում է Reuters-ը: Կինը հայտարարել է, որ իրեն բռնաբարել են պաշտպանության նախարար Լինդա Ռեյնոլդսի գրասենյակում 2019 թվականի մարտ ամսին, և նա եղել է Մորիսոնի իշխող՝ Լիբերալ կուսակցության աշխատակից։
Վերջինս տեղի ԶԼՄ-ներին հայտնել է, որ դիմել է ոստիկանություն այդ տարվա ապրիլ ամսին, բայց որոշել է, որ պաշտոնական բողոք ներկայացնելը կարող է վնասել իր կարիերային։ Ոստիկանությունից հաստատել են, որ խոսել են կնոջ հետ 2019 թվականի ապրիլին, սակայն նա չի ցանկացել պաշտոնապես բողոք ներկայացնել։
Կինը նաև պատմել է, որ Ռեյնոլդսի գրասենյակի բարձրաստիճան անձնակազմին հայտնել է իր հանդեպ տեղի ունեցած ոտնձգության մասին: Սակայն դրանից հետո իրեն խնդրել են մասնակցել գրասենյակի անձնակազմի հետ հանդիպմանը այնտեղ, որտեղ, ինչպես ինքն է պնդում, իր հանդեպ բռնություն են կիրառել:
Ավստրալիայի վարչապետ Մորիսոնը ներողություն է խնդրել կնոջից ու խոստացել հետաքննություն իրականացնել։
«Դա չպետք է տեղի ունենար, ես ներողություն եմ խնդրում»,- լրագրողներին հայտնել է Մորիսոնը։
Տաթև Ֆռանգյան
