18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Ըստ մեր նախագծի՝ սահմանամերձ համայնքների բնակիչներին զենք կտրամադրվի. Արմեն Խաչատրյան. ՏԵՍԱՆՅՈՒԹ
Քաղաքականություն
15.02.2021 | 16:32
Սահմանամերձ համայնքների բնակիչներին, ըստ մեր նախագծի, հնարավորություն կընձեռվի տրամադրել ակոսավոր որսորդական զենքեր։ Այս մասին ԱԺ-ում լրագրողների հետ զրույցում նշեց «Իմ քայլը» խմբակցության պատգամավոր Արմեն Խաչատրյանը՝ անդրադառնալով «Իմ քայլի» օրենսդրական նախաձեռնությանը, որով առաջարկում են զինել սահմանամերձ համայքների բնակիչներին:
Պատգամավորի խոսքով՝ փոխվել են իրավակարգավորումները, վերացրել են իրավական խոչընդոտները, որպեսզի քաղաքացիները հնարավորություն ունենան զենք կրելու:
«Որսորդական հրացանները շատ մոտ են մարտական հրացաններին, և այս նոր ստեղծված իրավիճակում, երբ սահմանամերձ գոտիներն անմիջական առնչություն ունեն Ադրբեջանի Հանրապետության հետ, կարծում ենք, անհրաժեշտություն է, որ այն քաղաքացիները, ովքեր ցանկություն ունեն զենք ունենալու, պետք է ունենան»,- նշեց Խաչատրյանը:
Պատգամավորի դիտարկմամբ՝ նախագիծը հրատապ է. «Եթե մի բան անհրաժեշտ է բնակիչների համար, պետք է արվի առանց ձգձգելու, բայց հրատապությունը սահմանային իրավիճակի հետ կապված չէ»:
Հարցին, թե արդյո՞ք ռիսկեր չկան, որ քաղաքացիները զենքը միմյանց դեմ կօգտագործեն, Խաչատրյանը պատասխանեց, որ ցանկացած զենք արդեն ռիսկ է, սակայն այն բնակիչները, ովքեր կստանան զենքը կրելու իրավունք, նրանց հետ համապատասխան աշխատանքներ են կատարվելու՝ զենքը կրելու, պահելու, կրակելու հմտությունների վերաբերյալ, նաև ոստիկանությունն է ուժեղացնելու հսկողությունը։
Մանրամասները՝ տեսանյութում:
