01.08.2026 | 19:09
Քննարկվել է ազատազրկվածների պահման պայմանների բարելավումը
Ադրբեջանը 2020թ․ 2․6 մլրդ դոլար է ծախսել պաշտպանության ոլորտի համար
Քաղաքականություն
12.02.2021 | 15:31
Ադրբեջանի կառավարությունը 2020 թվականին երկրի զինված ուժերի պաշտպանական կարողությունների ամրապնդման, նյութատեխնիկական ապահովման բարելավման համար պետական բյուջեից հատկացրել է 4 մլրդ 426․8 մլն մանաթ՝ 2 մլրդ 604 մլն դոլար։ Այս մասին ասվում է այդ երկրի Ֆինանսների նախարարության տարածած հաղորդագրությունում։
Նշվում է, որ սա 36․1 տոկոսով ավելին է 2019 թվականի հատկացումների համեմատ։ Նախարարության հաղորդագրության մեջ նաև նշվում է, որ 2020թ․ բյուջեով պաշտպանական ծախսերի համար հատկացվել է 3 մլրդ 787․5 մլն մանաթ՝ 2․2 մլրդ դոլար։ Սակայն պետբյուջեի իրական ծախսերը հաստատված ցուցանիշը գերազանցել են 639․3 մլն մանաթով կամ 376 մլն դոլարով։
Ֆինանսների նախարարությունը հաղորդել է, որ պետբյուջեից լրացուցիչ միջոցներ են հատկացվել նոր ռազմական տեխնիկայի գնման, զինծառայողների նյութական աջակցության, ռազմաճակատ ուղարկվածների ու մոբիլացված քաղաքացիների համար։
Նշենք նաև, որ Ադրբեջանի 2021թ․ բյուջեով պաշտպանության ու ազգային անվտանգության ծախսերը կրկին ավելացվում են՝ նախատեսվում է հատկացնել 4 մլրդ 585 մլն մանաթ։ Օրենքի համաձայն՝ պաշտպանության ոլորտին կհատկացվի 1 մլրդ 934 մլն մանաթ, ազգային անվտանգությանը՝ 260 մլն 612 հազար մանաթ, սահմանապահ ծառայությանը՝ 281 մլն 620 հազար մանաթ, պաշտպանության ու ազգային անվտանգության ոլորտի ուսումնասիրություններին՝ 3 մլն 901 հազար մանաթ, պաշտպանությանն ու ազգային անվտանգությանն առնչվող գործունեության մյուս ոլորտներին՝ 2 մլրդ 105 մլն մանաթ։ Սա 2020 թվականի ծախսերից ավելի է 20․5 տոկոսով։
Էմմա Չոբանյան
