10.08.2026 | 10:21
Գազանջատումներ՝ Լոռու և Արարատի մարզի մի շարք հասցեներում
Ինձ հետաքրքիր չէ, որ ասում են՝ տնօրենը կապվում է պաշտոնյայի հետ. նախարար. ՏԵՍԱՆՅՈՒԹ
Տեսանյութեր
10.02.2021 | 12:25
Շատ զարմացա, որ Աբովյանի թիվ 1 ավագ դպրոցի անձնակազմը, աշակերտները եկել էին ԿԳՄՍ նախարարության մոտ և բողոքում էին։ Ինչի՞ց են բողոքում, մամուլից հասկացա, որ ասում են՝ եկել ենք, պայքարենք անարդարության դեմ։ Այս մասին ԱԺ-ում ճեպազրույցի ժամանակ նշեց ԿԳՄՍ նախարար Վահրամ Դումանյանը՝ անդրադառնալով այդ դպրոցում տնօրենի ընտրության հետ կապված խնդիրներին:
«Իրենք պնդում էին, որ գիտեն, թե ով պետք է նշանակվի դպրոցի տնօրեն, բայց ես չգիտեի: Ես հարցին նոր էի ծանոթանում։ Ես երկու թեկնածուներին բացարձակապես չեմ ճանաչում, տվյալներ չունեի նրանց մասին։ Երբ ծանոթացա խնդրին, իմացա, որ երկու թեկնածուներն էլ 4-ական ձայն են ստացել, ասացի, որ այս մրցույթն պետք է ճանաչել անվավեր, չկայացած, բայց ինձ ասացին, որ գործող կարգը դա թույլ չի տալիս, և պետք է երկուսից մեկին պարտադիր հրամանագրել: Բայց այդ ընթացքում այն, ինչ ես տեսա, որ կանխակալ եկել էին, քաղաքականացված ինչ-որ հայտարարություններ էին անում, հասկացա, որ նման պնդումներն ու վերաբերմունքը տեղ չպետք է ունենան դպրոցական հանրության մեջ։ Դպրոցի առաքելությունը աշակերտին կրթություն տալն է։ Դպրոցում ամենաբարձր պաշտոնը տնօրենը չէ, այլ լավ ուսուցիչն է, և այսօր այդ անհիմն շահարկումները որևէ նպաստ չեն բերում աշակերտների կրթությանը»,- նշեց նախարարը:
Անդրադառնալով դիտարկմանը, որ նոր տնօրենին կապում են շրջակա միջավայրի նախարարի ընտանիքի հետ, ասում են՝ կնոջ ընկերուհին է, նախարարն ասաց. «Ես տեղյակ չեմ՝ ով ում հետ ինչ է կապում։ Դուք ասում եք՝ այս տնօրենը կապվում է այս գործչի հետ, այն օրը լրագրողներից մեկն ինձ հարց տվեց, իսկ մյուս տնօրենն էլ կապվում է այլ գործչի հետ, նման տեղեկություն ես չունեմ, ու դա հետաքրքիր չէ: Անձնական հարաբերությունների դաշտն ինձ հետաքրքիր չէ»։
Նախարարը հավաստիացրեց, որ դպրոցներում հովանավորչություն և կոռուպցիոն սխեմաներ չկան․ «Ես չեմ կարող աղմկողների անունից խոսել, հավանաբար նրանց «աղմկացնում» են: Իհարկե, այս աղմուկը հիմնավոր չէ, որովհետև ամեն ինչ արվել է օրենքի համաձայն: Եթե կան մարդիկ, որ համարում են, որ եղել է անօրինականություն, թող դիմեն իրավական լուծումներ ստանան: Բայց գալ, փորձել ճնշում գործադրել նախարարության, աշակերտների վրա, չի կարելի»:
Ինչ վերաբերում է նրան, որ արդեն քանի օր դասադուլ է այդ դպրոցում, Դումանյանն ասաց՝ իրենք ամեն ինչ կանեն, որ աշակերտներն ստանան իրենց կրթությունը. «Բայց դասադուլի կազմակերպիչները կրում են պատասխանատվություն այդ ամենի համար: Շատ անհասկանալի, ոչ օրինական ոճ են ընտրել»:
Մանրամասները՝ տեսանյութում:
