Եթե առաջարկում են պարտք չվերցնել, թող ասեն՝ ինչպե՞ս թոշակ, աշխատավարձ վճարենք․ Բաբկեն Թունյան

Հակառակորդը հարձակվում է այն ժամանակ, երբ համոզված է լինում, որ տարիների ընթացքում ավելի է ուժեղացել, քան իր հակառակորդը: Խորհրդարանում հայտարարությունների ժամին այս մասին ասաց ԱԺ «Իմ քայլը» խմբակցության պատգամավոր Բաբկեն Թունյանը:

«Ինչո՞ւ ենք մենք թույլ հակառակորդից. այս հարցի պատասխանը փնտրելիս բավարար կլինի նայել անցած տարիների տնտեսական ցուցանիշների, տնտեսական աճի, ռազմական բյուջեի, ընդհանուր բյուջեի համեմատություններին: Ներդրումների մասով, իհարկե, կա ցավալի անկում, բայց այդ անկումը անցած տարի արձանագրվել է աշխարհի գրեթե բոլոր երկրներում»,- նշեց Թունյանը:

Նա նաև հավելեց, որ եվրոբոնդերի թողարկումը ներկայացնել որպես ձախողում՝ այդքան էլ ճիշտ չէ, բարձր տոկոսով ասվածն էլ՝ հարաբերական է:

«Ովքեր ասում են՝ պարտքը բացարձակ թվով ավելացավ, պետք է նաև հաշվի առնեն մյուս կողմերը՝ մենք ունեցել ենք հարկերի նվազում, քովիդ, ունեցել ենք փակված ընկերություններ: Այսինքն՝ մեր հարկային եկամուտները մի կողմից նվազել են, մյուս կողմից՝ ծախսերն ավելացել են: Մենք աջակցություն ենք ցուցաբերել որոշ ոլորտների, ռազմական ծախսերն ենք ավելացրել, այս պայմաններում բյուջեն ունի դեֆիցիտ: Եվ եթե ինչ-որ մեկն առաջարկում է պարտք չվերցնել, ապա ինքը պետք է մեզ ցույց տա նաև այն ճանապարհը, թե ոնց պետք է մենք պետբյուջեի ծախսերը կատարենք, ինչի հաշվին պետք է աշխատավարձ, թոշակ վճարենք և այլն»,- նշեց պատգամավորը՝ ընդդիմադիր պատգամավորներին հորդորելով վերադառնալ կառուցողական դաշտ:

Մանրամասները՝ տեսանյութում: