Հաղթանակի վրա վստահ իշխանությունը գնում է դեպի դա, և եթե կա երկմտանք, ուրեմն ամեն ինչ միանշանակ չէ. Գոռ Գևորգյան. ՏԵՍԱՆՅՈՒԹ

Ստեղծվել է մթնոլորտ, որի պայմաններում արդարության բանաձևի հետևից գնացող ժողովուրդը և շատ-շատերը իրենց համար նպատակային են համարում սեփական ձայնի, քվեի ապահովումը, և սա պետք է լինի արտահերթ ընտրությունների միջոցով: Միևնույն ժամանակ, հասկանում ենք, որ ընտրությունների համար պետք է ճիշտ պահ լինի։ Այս մասին ԱԺ-ում լրագրողների հետ զրույցում նշեց ԱԺ պատգամավոր Գոռ Գևորգյանը՝ հավելելով, որ ընտրությունները պետք է խնդիրները կարգավորեն, ոչ թե հավելյալ խնդիրներ ստեղծեն:

«Չեմ կարծում, որ նման ծայրահեղ լարված սոցիալական մթնոլորտում և հանրային փոխհարաբերութունների միջև գրանցված այս ծայրահեղ լարման կամ ատելության մթնոլորտում մենք կարող ենք գնալ արտահերթ ընտրությունների: Բայց, միևնույն ժամանակ, հայտարարությունից հետո պետք է նշվի, որ ընտրությունները մնում են իրավիճակից դուրս գալու միակ բանալին, քանի որ մենք սահմանադրական պետություն ենք, և ժողովրդի քվեի իրավունքն ամրագրված է Սահմանադրությամբ, և ժողովուրդը պետք է որոշի՝ ո՞ր ճանապարհով է գնում և ո՞ւմ հետ է գնում»,- ասաց նա։

Պատգամավորն ընդգծեց, որ իր հաղթանակի վրա վստահ իշխանությունը գնում է դեպի դա, և եթե կա երկմտանք, ուրեմն՝ ամեն ինչ չէ, որ միանշանակ է։

Ինչ վերաբերում է իշխանության պնդումներին, թե ճանապարհային քարտեզի համատեքստում կրկին կանդրադառնան արտահերթ ընտրությունների գաղափարին, Գևորգյանը նշեց, որ այդ քարտեզում ժամկետներ նշված չեն․ «Պետք է նշեն արտահերթ ընտրություններ անցկացնելու մոտավոր ժամկետները։ Հանրության մեջ այնքան թեժ մթնոլորտ է ձևավորված, որ այս պայմաններում արկածախնդրություն է գնալ արտահերթ ընտրությունների»։

Մանրամասները՝ տեսանյութում: