19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Շինարարության ծավալները 2020թ․ նվազել են․ ավելացել են պետական միջոցներով կատարվող շինարարության ծավալները
Տնտեսություն
08.02.2021 | 15:48
2020 թվականին Հայաստանում շինարարության ծավալը, 2019 թվականի համեմատ, նվազել է 9․5%-ով, իսկ շինմոնտաժային աշխատանքների ծավալները՝ 5․8%-ով։ Այս մասին տեղեկանում ենք Պետական վիճակագրական ծառայության հրապարակած տվյալներից։
Պետական բյուջեի հաշվին կատարված շինարարության ծավալը՝ ընդհակառակը, 2019 թվականի համեմատ ավելացել է 6%-ով, շինմոնտաժային աշխատանքների ծավալներն էլ ավելացել են 23․8%-ով։ Միաժամանակ, սակայն, նվազել են միջազգային վարկային միջոցներով կատարված շինարարության ծավալները՝ 6․2%-ով։
Մեծապես աճել է համայնքային միջոցների հաշվին շինարարությունը, իսկ մարդասիրական օգնության միջոցներով կատարված շինարարության ծավալները՝ նվազել։
Այսպես․ 2020 թվականին, 2019 թվականի համեմատ, 43․2%-ով ավելացել են համայնքային միջոցների հաշվին կատարված շինարարության ծավալները, իսկ շինմոնտաժային աշխատանքի ծավալները՝ 40․6%-ով։
Մարդասիրական օգնության հաշվին շինարարության ծավալները նվազել են 68․4%-ով, իսկ շինմոնտաժային աշխատանքների ծավալները՝ 38․2%-ով։ Շինարարության ոլորտում մարդասիրական օգնություն են տրամադրել «Հայաստան» համահայկական հիմնադրամը, Հայ առաքելական եկեղեցին և այլ կառույցներ։
Ավելացել են նաև օտարերկրյա ներդրողների միջոցներով կատարված շինարարության ծավաները՝ 58․3%-ով, իսկ բնակչության միջոցներով կատարված շինարարության ծավալները, հակառակը, 34․3%-ով նվազել են։
Ընդհանուր առմամբ, 2020 թվականի Հայաստանում կատարվել է 413 միլիարդ 830.9 միլիոն դրամի շինարարություն, որից 141 միլիարդ 95.7 միլիոնը՝ պետական բյուջեի հաշվին։ Շինարարությունն ամենաակտիվը եղել է Երևանում, Կոտայքի և Սյունիքի մարզերում։
Անժելա Պողոսյան
