Եթե պատգամավորը չի հասկանում, թե ինչ է խոսում՝ թող չխոսի. Անի Սամսոնյանը՝ Անուշ Բեղլոյանին. ՏԵՍԱՆՅՈՒԹ

«Պատերազմի ամբողջ ընթացքում փաստերն են հավաքվել, ապացույցներ են մշակվել թե՛ կառավարությունում, թե՛ խորհրդարանում, վստահ եմ՝ կան նաև միջազգային իրավունքի մասնագետներ, որոնք աշխատում են այդ ուղղությամբ. գիտեն, որ դա եղել է Ադրբեջանի կողմից սանձազերծված ակտ, ինչպե՞ս կարելի է ասել, թե կարևոր չէ՝ ով է սկսել պատերազմը: Հենց կարևոր է, թե ով է սկսել պատերազմը»,- այս մասին Factor.TV-ի հետ զրույցում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով միջազգային տեսակոնֆերանսի ժամանակ ԱԺ «Իմ քայլը» խմբակցության պատգամավոր Անուշ Բեղլոյանի արտահայտած այն մտքին, թե կարևոր չէ՝ ով է սկսել պատերազմը, և ում պատմական հողերն են Արցախում:

«Եթե պատգամավորը չի հասկանում, թե ինչ է ասում, ավելի լավ է չմասնակցի նման կոնֆերանսների: Իսկ եթե ասում է միտումանվոր, մենք խնդիր ունենք. իշխանությունը պետք է տա պարզաբանումներ»,- նշեց Սամսոնյանը:

Նա նաև հիշեցրեց, որ նախորդ տարի կրթական չափորոշիչների հետ կապված խնդիր է բարձրաձայնվել, որ կրթական չափորոշիչների մշակմամբ զբաղվում է մի խումբ, որը նպատակ ունի վերախմբագրել մեր պատմությունը: «Ըստ էության՝ պատգամավորի այս արտահայտությունը նորություն չէ, քանի որ իշխանությունն ամեն օր իր հայտարարություններով փորձ է անում վերախմբագրել մեր պատմությունը: Տպավորություն է, որ իշխանությունները կորցրել են իրենց ազգային իմունիտետը և ամեն օր ականատես ենք լինում նրանց անպատասխանատու հայտարարություններին: Եթե դա հստակ քաղաքականություն է, պետք է ազնիվ լինեն մեզ հետ, եթե չեն հասկանում, թե ինչ են խոսում, սա այլ հարց է»,- նշեց Սամսոնյանը:

Անդրադառնալով Բեղլոյանի պարզաբանումներին՝ Սամսոնյանը նշեց. «Երբ հնչած հայտարարությունը գնացքի պես սլանում է, դառնում է հանրային սեփականություն և միջազգային հարթակներում դա մեզ վնաս է հասցնում, այլևս պարզաբանումներն անպտուղ են: Դրանով նրանք զբաղեցնում են լրատվամիջոցներին և ծիծաղում են մարդկաց վրա: Եթե չգիտեն ինչ խոսել, ավելի լավ է չխոսեն»: