Համառ պայքար եմ մղելու, որ անանուն աղբյուրներին հղում չտալու կետն օրենքի ուժ ստանա. Ա. Հովհաննիսյան. ՏԵՍԱՆՅՈՒԹ

Նոր նախագիծը օգնելու է տարանջատել բարեխիղճ լրագրությունն անբարեխիղճից: Այս մասին լրագրողների հետ զրույցում ասաց ԱԺ «Իմ քայլը» խմբակցության պատգամավոր Արթուր Հովհաննիսյանը՝ անդրադառնալով ԶԼՄ-ների մասին օրենքում փոփոխություններ կատարելու մասին նախագծի ստեղծման նախաձեռնությանը:

«Նախագիծն օգնելու է տարանջատել բարեխիղճ լրագրողներին ու ԶԼՄ-ներին անհայտ իրավակազմակերպչական ձև, անհայտ ծագումնաբանություն ունեցող ինչ-որ ռեսուրսներից, որոնք այսօր, ցավոք սրտի, երբեմն ավելի հայտնի են, քան բուն լրատվական գործունեություն ունեցող կազմակերպությունները»,- ասաց Հովհաննիսյանը՝ հավելելով, որ լրատվական դաշտը ոչ լրագրողական կազմակերպություններից մաքրելու անհրաժեշտություն կա և այդ գործում ակնկալում է նաև ԶԼՄ-ների աջակցությունը:

Պատգամավորի խոսքով` ներկայիս իրավիճակում լինում են դեպքեր, երբ հայտնի, խմբագրակազմ և քրտնաջան աշխատանք իրականացնող աշխատակազմ ունեցող ԶԼՄ-ները երբեմն հղում են տալիս անհայտ ծագմամբ թելեգրամյան ալիքներին, ֆեյսբուքյան էջերին, ինչի արդյունքում, ըստ Հովհաննիսյանի, գովազդվում են այդ անհայտ ծագմամբ էջերը, ինչն էլ առաջացնում է մի շարք խնդիրներ։

«Բոլոր այն լրատվական գործունեություն իրականացնողները, որոնք չունեն նույնականացման տվյալներ, բոլոր այդ աղբյուրների վրա հղում անելը և օգտագործել այդ աղբյուրի անունը` գովազդելով այդ աղբյուրին, արգելվելու է նոր նախագծով նախատեսված կարգավորմամբ»,- ասաց պատգամավորը` հայտարարելով, որ համառ պայքար է մղելու, որ անանուն աղբյուրներին հղում չտալու կետն օրենքի ուժ ստանա:

Պատգամավորը նաև ընդգծեց, որ այս նախագծով չի սահմանափակվում տեղեկատվություն տարածելու ազատությունը:

Մանրամասները՝ տեսանյութում: