Հայաստանի «աններելի» ու չմոռացվող պարտքը Ռուսաստանին

Օրերս՝ հունվարի 19-ին, ՌԴ Պետդուման առաջին ընթերցմամբ ընդունեց Ռուսաստանին Ղրղզստանի ունեցած ողջ պարտքը՝ 240 մլն դոլար արժեքով, դուրս գրելու մասին օրենքը:

Պարտքի դուրսգրումն ուղղված է երկրների հարաբերությունների զարգացմանը և օգնություն է Ղրղզստանի Հանրապետությանը: Դրանից առաջ էլ՝ 2016 թվականի առաջին կեսին Ռուսաստանը ներել էր Ղրղզստանի 30 միլիոն դոլարի պարտքը:

Սա Ռուսաստանի մեծահոգության եզակի օրինակ չէ: Factor.am-ը հաշվարկել է, որ վերջին 4 տարիներին Ռուսաստանը տարրբեր երկրների ներել է առնվազն 55 միլիարդ դոլարի պարտք, մինչդեռ Հայաստանի հանդեպ մեր ռազմավարական դաշնակիցը բացառիկ անզիջում մոտեցում է դրսևորել՝ 255 մլն դոլար պարտքի դիմաց ստանալով հսկայական գույք:

2002թ. հուլիսի 17-ին ստորագրվեց «Գույք պարտքի դիմաց» համաձայնագիրը, որով Ռուսաստանին ունեցած մոտ 100 մլն դոլար պարտքի դիմաց Հայաստանը ռուսական կողմին հանձնեց «Մարս», «Երևանի մաթեմատիկական մեքենաների», «Երևանի ավտոմատ կառավարման համակարգերի», «Երևանի նյութագիտության» գիտահետազոտական ինստիտուտ ՓԲԸ-ները և «Հրազդանի» ՋԷԿ-ի գույքահամալիրը: Իսկ 2013թ. դեկտեմբերին էլ Սերժ Սարգսյանը ստորագրեց 155 մլն դոլար պարտքի դիմաց «ՀայՌուսգազարդ» ընկերության վերջին՝ 20 տոկոս բաժնեմասը ռուսական կողմին հանձնելու համաձայնագիրը:

Ահա այսպիսի ռազմավարական դաշնակցություն, միայն թե՝ դժվար է պնդել, արդյոք դա ավելի շատ ռուսական կողմի՞, թե՞ Հայաստանի իշխանությունների թուլության արդյունքում եղավ:

Մանրամասները՝ տեսանյութում:

Սևակ Հակոբյան